बीडच्या केजमधील भाजपाच्या आमदार नमिता मुंदडा यांचे सासरे नंदकिशोर मुंदडा यांचा एका तरुणाला मारहाण करतानाचा आणि गळा दाबताना शिवीगाळ करणारा धक्कादायक व्हिडिओ सोशल मीडियावर व्हायरल झाला आहे. निवडणुकीच्या तोंडावर हा व्हिडिओ समोर येत असल्याने मोठी खळबळ उडाली आहे. आंबेजोगाई नगरपरिषदेच्या निवडणुकीत भाजपकडून नगराध्यक्ष पदासाठी नंदकिशोर मुंदडा हे उमेदवार आहेत. केज मतदारसंघाच्या आमदार नमिता मुंदडा यांचे ते सासरे असून, व्हायरल व्हिडिओमध्ये ते एका तरुणाला नग्न करून त्याचा गळा दाबत अश्लील शिवीगाळ करत असल्याचा प्रकार दिसत आहे.

लोकप्रतिनिधींच्या घरच्यांकडून असा प्रकार घडत असल्याने बीडमध्ये नेमकं काय चाललं आहे? कायद्याचा धाक उरलाय का? असा प्रश्न जनतेकडून सातत्याने उपस्थित केला जात आहे. मात्र हा व्हिडिओ नेमका कधीचा आहे, त्यामागचं कारण काय आहे, आणि या प्रकरणी संबंधित तरुणाने कोणती तक्रार दाखल केली आहे का हे पाहणं आता महत्त्वाचं ठरणार आहे. पोलिसांची पुढील कारवाई काय असते, याकडे सर्वांचे लक्ष लागले आहे.