सांगलीचे भाजपचे माजी खासदार संजयकाका पाटील हे अजित पवार यांच्या भेटीसाठी गेले आहेत. तासगाव कवठेमहांकाळ मतदारसंघासंदर्भात चर्चा करण्यासाठी ते अजित पवार यांच्या पक्ष कार्यालयात गेले आहेत.

संजयकाका पाटील यांच्या सुपुत्र प्रभाकर पाटील हे सांगलीच्या तासगाव कवठेमहांकाळ मतदारसंघातून निवडणुकीच्या रिंगणात उतरण्यास इच्छुक आहे. मात्र जागा वाटपाच्या तिढ्यात भाजपकडून उमेदवारी मिळण्याची शक्यता कमी असल्याने ते राष्ट्रवादी काँग्रेस अजित पवार गटाकडून मैदानात असतील अशी चर्चा सुरू झाली आहे. त्यामुळे त्याला अजित पवार गटाकडून उमेदवारी मिळावी याबाबत ते अजितदादांशी चर्चा करणार आहेत. यावेळी माध्यमांना प्रतिक्रिया देताना 'मी देवेंद्र भाऊंशी बोलून इकडे आलो आहे. अजितदादा यांना भेटलो ते म्हणले की, अजून चर्चा चालू आहे. जागा निश्चित झाल्या की ठरवता येईल.' असं संजयकाका पाटील यांनी म्हंटलं आहे. दरम्यान, विधानसभेला तासगाव- कवठेमहांकाळ मतदारसंघातून राष्ट्रवादी काँग्रेस शरद पवार यांच्या गटाकडून रोहित पाटील हे निवडणूक लढवणार आहेत. राष्ट्रवादी काँग्रेस शरद पवार विरुद्ध राष्ट्रवादी काँग्रेस अजित पवार,अशी लढत होण्याची शक्यता आहे.