सांगलीच्या जत नगरपरिषदेच्या मतदाना दरम्यान गोंधळ झाल्याचा प्रकार घडला आहे. मतदान केंद्रावर भाजप कार्यकर्ते आणि पोलीस कर्मचाऱ्यांमध्ये जोरदार वादावादीचा प्रकार घडला आहे. जत येथील शिवाजी पेठेत शाळा क्रमांक एक येथील मतदान केंद्रावर हा प्रकार घडला आहे. भाजपच्या प्रभाग 5 मधील महिला उमेदवार प्रणिता यादव यांना मतदान केंद्रा बाहेर काढण्यावरून महिला पोलीस कर्मचारी आणि यादव यांच्यामध्ये शाब्दिक बाचाबाची झाली. त्यानंतर यादव समर्थकांनी मतदान केंद्रामध्ये घुसून पोलिसांसोबत हुज्जत घातली. त्यामुळे पोलीस कर्मचारी आणि भाजप कार्यकर्त्यांमध्ये यावेळी जोरदार राडा झाला. दरम्यान पोलीस उपअधीक्षक सचिन थोरबोले यांनी घटनास्थळी धाव घेत भाजपच्या कार्यकर्त्यांची समजूत काढली. त्यामुळे या ठिकाणी काही काळ निर्माण झालेला तणाव निवळला.