कोरेगाव -भीमा दंगलप्रकरणातील चौकशी आयोगाने माजी मुख्यमंत्री उद्धव ठाकरे यांना कारणे दाखवा नोटीस बजावली आहे. यामुळे शरद पवार आणि देवेंद्र फडणवीस पुन्हा एकदा चर्चेत आले आहेत. शरद पवारांनी दंगल ही देवेंद्र फडणवीस यांच्या नेतृत्वाखालील सरकारचा कट असल्याचा आणि सत्तेचा गैरवापर झाल्याचा गंभीर आरोप करणारे पत्र तत्कालीन मुख्यमंत्री उद्धव ठाकरे यांना दिले होते. तेच पत्र सादर न केल्याने ही कारवाई करण्यात आली आहे. आयोगाने उद्धव ठाकरे यांना २ डिसेंबर रोजी वैयक्तिकरित्या किंवा प्रतिनिधींमार्फत हजर राहण्याचे निर्देश दिले आहेत. अन्यथा जामीनपात्र अटक वॉरंट जारी करण्याचा इशाराही दिला आहे. वंचित बहुजन आघाडीचे नेते प्रकाश आंबेडकर यांनी केलेल्या अर्जानंतर आयोगाने ही नोटीस बजावली. या प्रकरणामुळे महाराष्ट्राच्या राजकारणात पुन्हा एकदा जुने आरोप-प्रत्यारोप उफाळून आले आहेत.