सोलापुरात महापालिका आयुक्तांच्या कारवर भीम आर्मीच्या कार्यकर्त्यांनी गटाराचं पाणी फेकलं. सोलापुरातील मातोश्री रमाबाई आंबेडकर नगर परिसरात ड्रेनेजचं पाणी शिरलं असून, सर्वत्र दुर्गंधी आणि घाणीचं साम्राज्य पसरलं आहे. तसंच सार्वजनिक नळांद्वारे अशुद्ध पाण्याचा पुरवठा होत आहे. त्यामुळं आजारांनी डोकं वर काढलंय. याबाबत भीम आर्मीकडून महापालिका आयुक्त शीतल तेली-उगले यांना निवेदन देण्यात येणार होतं. पण आयुक्तांच्या भेटीसाठीची वेळ मिळाली नाही. त्यामुळं कार्यकर्ते आक्रमक झाले. त्यांनी आयुक्तांच्या कारवर गटाराचे पाणी फेकलं आणि निषेध नोंदवला.

याबाबत येत्या 15 ऑगस्टपर्यंत महापालिका प्रशासनाकडून सकारात्मक पाऊल उचलले नाही तर रमाबाई आंबेडकर परिसरातील महिलांना घेऊन महापालिकेवर मोर्चा काढण्याचा इशारा भीम आर्मीच्या वतीने देण्यात आला आहे. या प्रकरणात भीम आर्मीच्या कार्यकर्त्यांना पोलिसांनी ताब्यात घेतले आहे.