मुंबई गोवा महामार्गावरील माणगाव आणि इंदापूर या रखडलेल्या बायपास कामांच्या भूमिपूजनाचा कार्यक्रम आज रायगड लोकसभेचे खासदार सुनील तटकरे यांच्या हस्ते पार पडत आहे. मात्र, या कार्यक्रमाच्या निमंत्रण पत्रिकेतून शिवसेनेचे मंत्री भरत गोगावले यांचे नाव पुन्हा एकदा वगळण्यात आल्याची चर्चा रंगली आहे.

याआधीही रोहा येथील डॉ. चिंतामणराव देशमुख सभागृहाच्या कार्यक्रमात गोगावले यांना राष्ट्रवादीने डावलण्यात आले होते. ज्यामुळे मोठा वाद निर्माण झाला होता. त्यानंतर आता पुन्हा इंदापुर आणि माणगाव बायपास कामाच्या भूमिपूजन कार्यक्रमात भाजप नेत्यांना सोबत घेऊन शिवसेनेला डावळण्याची खेळी राष्ट्रवादीने केली असून याची उलट सुलट चर्चा रायगडच्या राजकीय वर्तुळात सुरु झाली आहे. यामुळे रायगडमध्ये राष्ट्रवादी विरुध्द शिवसेना वादात आगामी स्थानिक स्वराज्य संस्था निवडणुकीच्या पार्श्वभुमीवर भाजपची भूमिका महत्वाची ठरणार आहे.