बीडचे पोलीस अधीक्षक आता अॅक्शन मोडवर आलेले बघायला मिळत आहे. सरपंच संतोष देशमुख यांच्या हत्येनंतर नवनीत कावत यांनी बीडच्या अधीक्षक पदाची सूत्र हाती घेतली आहे. त्यानंतर आता त्यांनी बीडमध्ये सुरू असलेल्या अवैध धंद्यांवर कारवाईचा धडाका सुरू केला आहे.

बीडचे सरपंच संतोष देशमुख यांची हत्या ही खंडणी प्रकरणातून झाली असल्याचा दावा गावकऱ्यांकडून आणि विरोधकांकडून केला जात आहे. यात खंडणी प्रकरणी वाल्मिक कराड याला देखील पोलिसांनी अटक केली असून सध्या तो मकोका अंतर्गत कोठडीत आहे. त्यानंतर या प्रकरणाच्या तपासासाठी नवनीत कावत यांनी बीडच्या अधीक्षक पदाचा कारभार स्वीकारला आहे. आता ते अॅक्शन मोडवर आलेले बघायला मिळत असून बीड जिल्ह्यातल्या सर्व अवैध धंद्यांवर कारवाई सुरू झाली आहे. यात दारू, गुटखा, जुगार, वाळू माफियांना त्यांनी दणका दिलेला आहे. तब्बल ६७१ गुन्हे अवैध धंद्यांविरोधात दाखल करण्यात आलेले आहेत. तसंच या माफियांकडून ३ कोटी २५ लाखांचा मुद्देमालही जप्त करण्यात आला आहे.