बदलापुरातील शिवसेनेचे नगरसेवक हेमंत चतुरे यांना बेदम मारहाण झालीय. भाजपच्या पदाधिकाऱ्यांनी मारहाण केल्याचा आरोप चतुरे यांच्या कुटुंबियांनी केलाय. हेमंत चतुरे यांच्यावर खाजगी रुग्णालयात उपचार सुरू आहेत. दरम्यान हेमंत चतुरे हे शिवसेनेचे कुळगाव बदलापूर नगरपरिषदेचे स्वीकृत नगरसेवक आहेत. नगरपालिका निवडणुकाच्या वेळी हेमंत चतुरे यांनी भाजपला रामराम ठोकत शिवसेनेत प्रवेश केला होता.

हेमंत चतुरे हे भाजपमध्ये असताना आमदार किसन कतोरे यांचे निकटवर्तीय होते. विधानसभा निवडणुकीच्या प्रचारादरम्यान, आमदार किसन कथोरे यांनी शिवसेनेच्या उपशहर प्रमुखाला भाजपमध्ये सामील करून शिवसेनेचे वामन म्हात्रे यांना अप्रत्यक्षपणे आव्हान दिलं होतं. त्यानंतर शिवसेनेचे वामन म्हात्रे यांनी भाजपचा सूड उगवला. त्यांनी भाजपचे माजी नगरसेवक हेमंत चतुरे यांना भाजपमधून फोडलं आणि शिवसेनेत प्रवेश दिला. हाती आलेल्या माहितीनुसार आज गुरुवारी रात्री नगरसेवक हेमंत चतुरे यांच्यावर कोणीतरी हल्ला केला. यात त्यांच्या चेहऱ्याला मार लागलाय.