शासनाच्या अंत्योदय साडी वाटप योजनेंतर्गत नाशिक जिल्ह्यातील दीड लाखांहून अधिक महिलांना साड्यांचे वाटप करण्यात आले आहे. जिल्हा पुरवठा विभागाने एकूण १,५२,९१० साड्यांचे यशस्वी वितरण केले असून, हे वाटप एकूण उद्दिष्टाच्या ८६.३४ टक्के इतके आहे.

ही मोहीम वेळेत आणि प्रभावीपणे राबवून हजारो महिलांच्या चेहऱ्यावर आनंदाची लहर फुलवण्यात जिल्हा पुरवठा विभागाने महत्त्वपूर्ण भूमिका बजावली आहे.

राज्य सरकारने अंत्योदय रेशनकार्डधारक कुटुंबांतील महिलांना दरवर्षी मोफत साडी देण्याचा निर्णय घेतला असून, यावर्षी नाशिक जिल्ह्यातील १,७६,००० लाभार्थ्यांपैकी ८६ टक्के महिलांना साड्यांचे वाटप पूर्ण करण्यात आले आहे. उर्वरित २४,०१४ लाभार्थ्यांना जूनच्या पहिल्या आठवड्यात साड्यांचे वितरण करण्यात येणार आहे.

जिल्ह्यातील सर्व १५ तालुक्यांतील २,६०८ रेशन दुकानांमार्फत हे वितरण सुरू असून, ई-पॉस मशीनच्या माध्यमातून लाभार्थ्यांची नोंद घेऊन साड्यांचे वाटप केले जात आहे.

गेल्या वर्षी आचारसंहितेमुळे साडी वाटपात आठ महिन्यांचा विलंब झाला होता. यंदा अशा त्रुटी टाळण्यासाठी तालुका अधिकाऱ्यांना वेळेत वितरण पूर्ण करण्याबाबत स्पष्ट सूचना देण्यात आल्या आहेत.