साताऱ्यात ड्रग्जचा व्यवसाय सरकारच्या आशीर्वादाने चालू आहे असा गंभीर आरोप शिवसेना (उबाठा) नेते अंबादास दानवे यांनी केला आहे. उपमुख्यमंत्री एकनाथ शिंदे यांच्या गावाजवळच हे रॅकेट सुरू असून यामध्ये त्यांच्या भावाचे नाव आल्याचा दावा दानवे यांनी केला. तसेच त्या ठिकाणी ७५ लाखांचा रस्ता कोणासाठी बांधला, असा सवालही त्यांनी उपस्थित केला. दुसरीकडे, काँग्रेसच्या प्रज्ञा सातव यांनी विधान परिषद सदस्यत्वाचा राजीनामा दिल्यानंतर विरोधी पक्षनेतेपदाचा पेच निर्माण झाला आहे. सरकार विरोधी पक्षनेत्याविना सभागृह चालवून जनतेच्या प्रश्नांना उत्तरे देण्यापासून पळ काढत आहे अशी टीका दानवे यांनी केली. विधानसभेत शिवसेनेचे संख्याबळ जास्त असल्याने भास्करराव जाधवांचे नाव दिल्याचेही त्यांनी स्पष्ट केले.