पुणे आणि पिंपरी-चिंचवडमध्ये अजित पवारांची राष्ट्रवादी आणि शरद पवारांची राष्ट्रवादी काँग्रेस एकत्रित महापालिका निवडणुका लढत आहेत. गेल्या काही दिवसांपासून दोन्ही राष्ट्रवादींचे नेते एकाच व्यासपीठावरून प्रचार करताना दिसत आहेत. त्यामुळे महापालिका निवडणूक निकालानंतर दोन्ही राष्ट्रवादी काँग्रेस पक्षांचे विलीनीकरण होणार असल्याच्या चर्चांना ऊत आला होता. याबाबत अजित पवारांना प्रसारमाध्यमांच्या प्रतिनिधींनी विचारलं असता, दोन्ही राष्ट्रवादींचे विलीनीकरण होणार नाही, असं त्यांनी स्पष्ट केलं.

महापालिका निवडणुकीनंतर दोन्ही राष्ट्रवादी काँग्रेस पक्षांचे विलीनीकरण आणि खासदार सुप्रिया सुळे या केंद्रात मंत्री होतील अशी चर्चा सुरू होती. या दोन्ही चर्चांना स्वतः अजित पवार यांनी पूर्णविराम दिला आहे. विलीनीकरणाचा प्रश्नच येत नाही. ते इंडिया आघाडीत आहेत. आम्ही एनडीएत आहोत. त्यामुळे दोन्ही राष्ट्रवादी एकत्र येतील असं काही नाही, असे अजित पवार म्हणाले.