पुणे जिल्ह्यातील दौंड येथील न्यू अंबिका कला केंद्रामध्ये सोमवारी रात्री साडे दहा ते अकरा वाजेच्या सुमारास गोळीबार झाला होता. सत्ताधारी पक्षाचा आमदार असल्याने हे प्रकरण दाबण्याचा जोरदार प्रयत्न झाला असा आरोप राष्ट्रवादी शरद पवार गटाचे आमदार रोहित पवार यांनी केला होता. परंतु हे प्रकरण बाहेर आले आणि आता भोर मुळशीचे आमदार शंकर मांडेकर यांच्या भावासह तीन जणांच्या मुसक्या आवळल्या आहेत.

कैलास उर्फ बाळासाहेब हिरामण मांडेकर याने नाचताना बंदूक काढून हवेत गोळीबार केला होता. पोलिसांकडून हे प्रकरण दाबण्याचे प्रयत्न सुरू होते. न्यू अंबिका कला केंद्राचे व्यवस्थापक बाबासाहेब अंधारे यांनी यवत पोलिस ठाण्यात तक्रार दाखल केली असून गणपत जगताप. बाळासाहेब मांडेकर, चंद्रकांत मारणे आणि एक अनोळखी व्यक्ती यांच्याविरोधात गुन्हा दाखल करण्यात आला आहे. बाळासाहेब मांडेकर हा अजित पवार गटाचे आमदार शंकर मांडेकर यांचा भाऊ आहे. यामुळे हे प्रकरण दाबण्यास प्रयत्न सुरू आहे अशी चर्चा आहे.