नागपूर: येथील राष्ट्रवादी काँग्रेस अजित पवार गटाच्या कार्यालयात आयोजित दिवाळी स्नेहमिलन कार्यक्रमात लावणीचे सादरीकरण झाल्याचा व्हिडीओ समोर आला आहे. या कार्यक्रमाचा व्हिडीओ सोशल मीडियावर व्हायरल होत असून, त्यामुळे राजकीय वर्तुळात चर्चेला उधाण आले आहे.

गणेशपेठ येथील राष्ट्रवादी अजित पवार गटाच्या कार्यालयात रविवारी हा स्नेहमिलन कार्यक्रम पार पडला. या कार्यक्रमात प्रसिद्ध नृत्यांगना शिल्पा शाहीर यांनी लावणी सादर केली. शिल्पा शाहीर या स्वतः राष्ट्रवादीच्या पदाधिकारी असल्याचे स्थानिक नेत्यांनी सांगितले आहे.

दरम्यान, पक्षाच्या कार्यालयात अशा प्रकारचे लावणी सादरीकरण करण्यात आल्यामुळे वाद निर्माण होण्याची शक्यता वर्तवली जात आहे. सोशल मीडियावर हा व्हिडीओ मोठ्या प्रमाणात शेअर होत असून, अनेकांनी यावर संताप व्यक्त केला आहे.