संजय राऊतांच्या अडचणी वाढण्याची शक्यता आहे. अहमहनगरमध्ये संजय राऊत यांच्याविरोधात गुन्हा दाखल झाला आहे. नरेंद्र मोदी यांच्याबाबत केलेल्या वक्तव्याप्रकरणी राऊतांविरोधात गुन्हा दाखल करण्यात आलाय. नगर-दक्षिण लोकसभा मतदारसंघातील महाविकास आघाडीचे उमेदवार निलेश लंके यांच्या प्रचारासाठी 8 मे रोजी अहमदनगर मध्ये जाहीर सभा घेण्यात आली होती. या सभेत संजय राऊत यांनी औरंगजेब आणि पंतप्रधान नरेंद्र मोदी यांचा जन्म एकाच गावात झाला होता, असा दावा केलेला. एका औरंगजेबाला महाराष्ट्रामध्ये आम्ही गाडलं तर तू कोण? असा एकेरी उल्लेख देखील संजय राऊत यांनी केला होता. राऊतांच्या या वक्तव्याविरोधात पोलिसांनी गुन्हा दाखल करुन घेतला आहे. कोतवाली पोलीस स्टेशनमध्ये अतुल काजळे या पोलीस कर्मचाऱ्याच्या फिर्यादीवरून गुन्हा दाखल करण्यात आला आहे. राऊत यांच्या विरोधात भादंवि कलम 171( क) 506 आणि लोकप्रतिनिधी अधिनियम 123 (3) नुसार गुन्हा दाखल करण्यात आला आहे.