मुंबई महानगरपालिकेच्या मतदार यादीत मोठा घोळ असल्याचा गंभीर आरोप शिवसेना (उबाठा) नेते आदित्य ठाकरे यांनी केला आहे. निवडणूक आयोगाचा आकडा ११ लाख होता, जो आम्हाला आकडा सापडला तो साधारणपणे १४ लाख आहे असा दावा ठाकरेंनी पत्रकार परिषदेत केला. १ जुलै २०२५ नंतर यादीत ३२ ते ३३ हजार नवीन मतदार समाविष्ट झाल्याचे त्यांनी निदर्शनास आणून दिले. मृत मतदारांची नावे आणि एकाच व्यक्तीचे नाव अनेकदा आल्याचे पुरावे त्यांनी मांडले. या पत्रकार परिषदेत त्यांच्यासोबत सिनेट सदस्य परम यादव आणि मिलिंद साटम उपस्थित होते. निवडणूक आयोग आणि बीएमसी प्रशासनावर त्यांनी सडकून टीका केली.