संजय गडदे, साम प्रतिनिधी

"करुन गेलं गाव आणि आलं रावचं नाव" अशी म्हण आपण सर्वांनी ऐकली असेल, त्याची प्रचिती अंधेरी पश्चिमेकडील लोखंडवाला परिसरातील लोकांना आली. येथे एका अभिनेत्रीने भररस्त्यात राडा घातलाय. अभिनेत्री खुशी मुखर्जीच्या कारला एका रिक्षावाल्यानं धडक दिली. त्याचा राग अभिनेत्रीनं एका फटाके विक्रेत्यावर काढला. रागाच्या भरात मुखर्जीने जवळच असलेल्या फटाके विक्रेत्यांच्या दुकानातील फटाके रस्त्यावर फेकून दिले.

प्रत्यक्षदर्शींनुसार, फटाके विक्रेते रस्त्यावरच अनधिकृतपणे स्टॉल लावून विक्री करत होते. त्यामुळे रस्त्यावर गर्दी आणि गोंधळ निर्माण झाला होता. अपघातानंतर रागाच्या भरात खुशी मुखर्जीने विक्रेत्यांवर संताप व्यक्त करत फटाके फेकून दिल्याने काही काळ परिसरात गोंधळाचे वातावरण निर्माण झाले. घटनेनंतर पोलिसांनी ठिकाणी धाव घेऊन परिस्थिती नियंत्रणात आणली असून, दोन्ही पक्षांकडून स्पष्टीकरण घेतले जात आहे. या प्रकरणाचा पुढील तपास पोलिसांकडून सुरू आहे.