MLA Sanjay Gaikwad Rada At Amdar Nivas : पावसाळी अधिवेशनासाठी आमदार निवासात मुक्कामाला असलेले शिवसेनेचे आमदार संजय गायकवाड यांनी कॅन्टीनमधील निकृष्ट जेवणावरून कर्मचाऱ्याला मारहाण केल्याची घटना घडली. खराब आणि शिळ्या जेवणामुळे संतापलेले गायकवाड रागाच्या भरात केवळ टॉवेल आणि बनियानवर कॅन्टीनमध्ये पोहोचले. त्यांनी कर्मचाऱ्याला भाजीचा वास घेण्यास सांगत खराब जेवणाबाबत तीव्र नाराजी व्यक्त केली आणि कर्मचाऱ्याला थेट हाताने मारहाण केली. या गोंधळादरम्यान काही जणांनी घटनेचा व्हिडिओ रेकॉर्ड केला, जो आता चर्चेचा विषय ठरला आहे.

गायकवाड यांनी कॅन्टीनच्या व्यवस्थापनाला देखील धारेवर धरत जेवणाच्या दर्जाबाबत तक्रार केली. या प्रकरणावर ते आज विधानसभेत प्रश्न उपस्थित करणार असल्याचे त्यांनी जाहीर केले आहे. ही घटना सध्या राजकीय वर्तुळात आणि सामान्यांमध्येही खळबळ माजवत आहे, कारण आमदाराच्या या कृतीवरून त्यांच्या संयम आणि जबाबदारीवर प्रश्नचिन्ह उपस्थित झाले आहे.