Who Is Sachin Dhas:

बीडच्या मातीतला मराठमोळा खेळाडू सचिन धस हा भारतीय संघाच्या विजयाचा हिरो ठरला आहे. आयसीसी अंडर १९ वर्ल्डकप २०२४ स्पर्धेच्या सेमीफायनलमध्ये भारत आणि दक्षिण आफ्रिका हे दोन्ही संघ आमने सामने आले होते.

या सामन्यात भारतीय संघाला विजयासाठी २४५ धावांची गरज होती. या धावांचा पाठलाग करताना भारतीय संघाने २ गडी राखून विजय मिळवला.या विजयात सचिनने सर्वाधिक ९६ धावांची खेळी केली. तर उदय सहारनने ८१ धावा जोडल्या. दोघांनी मिळून १७१ धावा जोडत संघाला फायनलचं तिकीट मिळवून दिला.

हा सामना सुरुवातीलाच भारतीय संघाच्या हातून निसटला होता. कारण २४५ धावांचा पाठलाग करत असताना दक्षिण आफ्रिकेच्या गोलंदाजांनी अवघ्या ३२ धावांवर भारताच्या ४ फलंदाजांना माघारी धाडलं. त्यानंतर सचिनने मोर्चा सांभाळत ११ चौकार आणि १ षटकाराच्या मदतीने ९६ धावांची तुफानी खेळी केली. त्याला या स्पर्धेतील सलग दुसरं शतक झळकावण्याची संधी होती. मात्र त्याचं हे शतक केवळ ४ धावांनी हुकलं आहे.

कोण आहे सचिन धस?

सचिन धस हा महाराष्ट्रातील बीड जिल्ह्यात राहतो. सचिनच्या जन्मापूर्वीच त्याच्या वडिलांनी स्वप्न पाहिलं होतं की, माझा मुलगा मोठा क्रिकेटपटू होणार. सचिनचे वडील सचिन तेंडुकरचे मोठे फॅन आहेत. (Cricket news in marathi)

त्यांचं स्वप्न पूर्ण करण्यासाठी सचिनने वयाच्या चौथ्या वर्षीच बॅट पकडली आणि महाराष्ट्राने भारताला दुसरा सचिन दिला. त्याचं नाव हे सचिन तेंडुलकरच्या नावावरुन ठेवण्यात आलं आहे. त्याने नेपाळविरुद्ध झालेल्या सामन्यात आपल्या वडिलांच्या वाढदिवशीच शतक झळकावलं होतं.

सचिनची आई सुरेखा धस या महाराष्ट्र पोलिसमध्ये सहायक पोलिस निरीक्षक म्हणून कार्यरत आहेत. तर त्या माजी कबड्डीपटू देखील आहेत. तर सचिनची बहीण पुण्यात स्पर्धा परिक्षांची तयारी करतेय. आपला मुलगा आपलं स्वप्न पूर्ण करणार या आशेनेच त्याच्या वडिलांनी त्याच्या हातात बॅट दिली. सचिननेही वडिलांचं स्वप्न पू्र्ण करुन दाखवलं.

आयुष्याचं शिखर गाठल्यासारखं वाटेल..

सचिनच्या वडिलांनी साम टीव्हीला दिलेल्या मुलाखतीत म्हटले होते की,'माझी इतकीच अपेक्षा आहे की, त्याने हा आशिया कप, अंडर १९ वर्ल्डकप आणि लवकरच भारतीय संघाचं प्रतिनिधित्व करावं हीच माझी इच्छा आहे. असं झाल्यास मला आयुष्याचं सर्वात मोठं शिखर गाठल्यासारखं वाटेल.'