Arjun Tendulkar in IPL 2023 : आयपीएल २०२३ स्पर्धेला उद्या, ३१ मार्चपासून सुरुवात होत आहे. आयपीएल जेतेपदासाठी सर्वच संघातील खेळाडू मैदानावर घाम गाळत आहेत. रोहित शर्माच्या नेतृत्वाखालील मुंबई इंडियन्स आणखी एका जेतेपदासाठी कसून सराव करत आहे. मुंबई इंडियन्सचा युवा ऑलराउंडर अर्जुन तेंडुलकर सुद्धा मेहनत घेत आहे. यंदाच्या मोसमात अर्जुनला मुंबई इंडियन्सच्या प्लेइंग इलेव्हनमध्ये संधी मिळणार आहे का? या प्रश्नाचं उत्तर आता खुद्द कर्णधार रोहित शर्मानं दिलं आहे.

आयपीएलची चर्चा तर होतेच. त्यातल्या धुरंधर खेळाडूंकडे अवघ्या क्रिकेट विश्वाचं लक्ष असतं. त्यात मुंबई इंडियन्स, चेन्नई सुपरकिंग्ज आणि रॉयल चॅलेंजर्स बेंगळुरू या संघाच्या कामगिरीकडे लागलं आहे. पण क्रिकेटचं वेड असलेल्या अवघ्या तरुणाईला एकच प्रश्न पडला आहे तो म्हणजे अर्जुन तेंडुलकरला यंदा मुंबई इंडियन्सच्या प्लेइंग इलेव्हनमध्ये घेणार का? तर या प्रश्नाचं उत्तर स्वतः रोहित शर्मानं दिलं आहे.

अर्जुन तेंडुलकरला संधी मिळेल का? या प्रश्नावर रोहित शर्मानं उत्तर दिलं आहे. तो म्हणाला, 'चांगला प्रश्न आहे. ते अपेक्षित होतेच.' तो म्हणाला, की अर्जुनने आपल्या गोलंदाजीने सगळ्यांनाच प्रभावित केले आहे. जर त्याची या मोसमासाठी तयारी झाली असेल तर निश्चितच त्याच्या निवडीवर विचार केला जाईल.

यावेळी मुंबई इंडियन्सचा प्रशिक्षक मार्क बाउचर देखील उपस्थित होता. मार्क बाउचर म्हणाला की, तो दुखापतीतून सावरत आहे. तो सराव करण्यासाठी मैदानात येणार आहे. गेल्या सहा महिन्यांपासून तो चांगला खेळत असल्याचे मला तरी वाटते. विशेषतः गोलंदाजी चांगली करत आहे. त्यामुळे मला तरी असे वाटते की त्याला संधी मिळू शकते. जर आम्ही त्याची निवड करू शकत असू, तर आमच्यासाठी ती खूप चांगली बाब असेल.