नुकतंच टीम इंडियाने विमेंस आयसीसी क्रिकेट वर्ल्डकप जिंकला. हा वर्ल्डकप जिंकल्यानंतर भारतीय महिला क्रिकेट टीमने पंतप्रधान नरेंद्र मोदी यांची भेट घेतली. सध्या या भेटीचा एक मजेशीर व्हिडीओ सोशल मीडियावर व्हायरल होतोय. या भेटीमध्ये टीम इंडियाची फलंदाज हरलीन देओलने पंतप्रधानांना असा प्रश्न विचारला की, संपूर्ण सभागृहात एकच हशा पिकला.

हरलीन देओलने घेतला इंटरव्ह्यू

वर्ल्डकप विजयाच्या निमित्ताने झालेल्या या भेटीत वातावरण भावनिक असतानाच खूपच हलकंफुलकं आणि मजेशीर होतं. यावेळी हरलीन देओलचं एनर्जी आणि टीमचं मनोबल वाढवण्यासाठी असलेल्या भूमिकेचं पंतप्रधान नरेंद्र मोदींनी कौतुक केलं. त्याच वेळी हरलीनने हसत-हसत एक प्रश्न विचारला “सर, तुमचं स्किन केअर रूटीन काय आहे?” या अनपेक्षित प्रश्नावर संपूर्ण हॉलमध्ये हास्याची लाट उसळली.

पंतप्रधान मोदींचं विनोदी उत्तर

हरलीनच्या प्रश्नावर पंतप्रधान मोदींनाही हसू आवरलं नाही. यावेळी त्यांनी अत्यंत सहजतेने उत्तर दिलं, “मी याबद्दल विचारच करत नाही. त्यांच्या या साध्या उत्तरावर उपस्थित सर्वजण हसले. त्याच वेळी टीममधील खेळाडू स्नेह राणाने मिश्कीलपणे म्हटलं, “सर, कोट्यवधी भारतीयाचं देशप्रेम आहे!” यावर पुन्हा एकदा हशा पिकला.

कोच अमोल मझुमदार यांची मिश्कील टिप्पणी

टीमचे कोच अमोल मझुमदारही या गमतीशीर वातावरणात मागे राहिले नाहीत. त्यांनी हसत म्हटलं, “सर हेच ते खेळाडू आहेत ज्यांच्याशी मला रोज झगडावं लागतं… त्यामुळेच माझे केस पांढरे झाले आहेत.” त्यांच्या या विनोदावर पंतप्रधान मोदी आणि संपूर्ण टीम पुन्हा एकदा जोरजोरात हसू लागली.

इंग्लंड दौऱ्यावरील किस्साही केला शेअर

या प्रसंगी कोच मझुमदार यांनी इंग्लंड दौऱ्याशी संबंधित एक भावनिक आठवणही शेअर केली. त्यांनी सांगितलं की, त्या वेळी खेळाडूंना किंग चार्ल्स यांच्यासोबत फोटो काढण्याची संधी मिळाली होती. पण प्रोटोकॉलमुळे संपूर्ण टीम एकत्र फ्रेममध्ये येऊ शकला नाही. तेव्हा एका खेळाडूने हसत म्हटलं होतं, “काही हरकत नाही, आपण हा क्षण वर्ल्ड कप जिंकल्यावर आणि पंतप्रधान मोदींना भेटण्यासाठी जपून ठेवू.” आणि ती गोष्ट खरी ठरली.