Ind vs Nz Final : चॅम्पियन्स ट्रॉफी २०२५ च्या अंतिम सामन्याला अवघे काही तास उरले आहेत. या सामन्यामध्ये भारत आणि न्यूझीलंड हे दोन बलाढ्य संघ एकमेकांच्या समोर येणार आहेत. अशातच टीम इंडिया आणि चाहत्यांसाठी वाईट बातमी समोर आली आहे. सराव करत असताना विराट कोहलीला दुखापत झाली आहे. नेट्समध्ये एक चेंडू त्याच्या गुडघ्यावर येऊन जोरात आदळला.

पाकिस्तानची वेबसाईट जियो न्यूजने दिलेल्या माहितीनुसार, सरावादरम्यान चेंडू विराट कोहलीच्या गुडघ्यावर जाऊन आदळला. दुखापतीमुळे विराटची वाईट अवस्था झाली. त्याच्या गुडघ्याला जोरदार वेदना झाल्या. दुखापत झाल्यानंतर विराट नेट्समधून बाहेर पडला, यावरुनच त्याच्या दुखापतीचा अंदाज लावू शकतो असे पाकिस्तानच्या वेबसाईटने म्हटले.

चॅम्पियन्स ट्रॉफीच्या अंतिम सामन्यापूर्वी विराट कोहली जखमी झाल्याने टीम इंडियाचे चाहते निराश झाले आहेत. कोहली या स्पर्धेमध्ये भारतासाठी महत्त्वपूर्ण खेळाडू आहे. त्याच्या दुखापतीमुळे टीम इंडियाचे टेन्शन वाढल्याचे लोक म्हणत आहेत. टीम मॅनेजमेंटने याबाबत माहिती दिली आहे. कोहलीच्या दुखापतीबाबत घाबरण्याचे काही कारण नाही, तो अंतिम सामना खेळण्यासाठी पूर्णपणे फिट आहे, असे टीम मॅनेजमेंटने म्हटले आहे.

विराट कोहलीने चॅम्पियन्स ट्रॉफीमध्ये तुफानी खेळ केला आहे. त्याने एकूण चार सामन्यांमध्ये एक शतक आणि एक अर्धशतक यांच्या सहाय्याने तब्बल २१७ धावा केल्या आहेत. चॅम्पियन्स ट्रॉफी २०२५ मधील सर्वाधिक धावा करणाऱ्या फलंदाजांच्या यादीत त्याचा समावेश आहे. त्याचा फॉर्म अंतिम सामन्यातही राहावा अशी प्रार्थना चाहते करत आहेत.