RR VS GT IPL 2025 : राजस्थान विरुद्ध गुजरात सामन्याच्या दुसऱ्या डावापासून सर्वत्र फक्त वैभव सूर्यवंशीचे नाव ऐकायला मिळत आहे. १४ वर्षांच्या वैभव सूर्यवंशीने आयपीएलमध्ये पदार्पणानंतर लगेचच तिसऱ्या सामन्यात शतकीय खेळी केली. आयपीएल इतिहासात एका भारतीयाने केलेले हे सर्वात जलद शतक होते. त्याने २६५.७९ च्या स्ट्राईक रेटने ३० चेंडूत १०१ धावा केल्या. यात ७ चौकार आणि ११ षटकारांचा समावेश होता.

गुजरातच्या गोलंदाजांचा समाचार घेत वैभव सूर्यवंशीने क्रिकेटजगतात ठसा उमटवला. त्याने अनेक विक्रम मोडत इतिहास रचला. सचिन तेंडुलकर, रोहित शर्मा यांच्यासह अनेक क्रिकेट विश्वातील दिग्गज वैभवचे चाहते बनले आहेत. सामना संपल्यानंतर वैभवला प्लेयर ऑफ द मॅचच्या अवॉर्डने सन्मानित करण्यात आले. प्लेयर ऑफ द मॅच जिंकणारा वैभव हा आयपीएलमधला सर्वात तरुण खेळाडू आहे.

वैभव सूर्यवंशीला सामना संपल्यानंतर 'तुला कसली भीती आहे का? तु कुणाला घाबरतोस का? (एका प्रकारे, कोणत्या गोलंदाजाला घाबरतोस का?)' असा प्रश्न विचारण्यात आला. तेव्हा वैभव म्हणाला, नाही असं काही नाहीये. मी अशा गोष्टींवर जास्त विचार करत नाही. मी फक्त खेळण्यावर लक्ष केंद्रित करतो. वैभवने त्याच्या आयपीएल कारकीर्दीची सुरुवात एका दमदार षटकाराने केली होती.

'आयपीएलमध्ये शतक करणे हे स्वप्नवत आहे. हे जे घडतंय ते खूपच छान आह. आयपीएलच्या माझ्या तिसऱ्या सामन्यातील हे माझे पहिले शतक आहे. मागील तीन-चार महिन्यांपासून मी करत असलेल्या सरावाचे परिणाम दिसून येत आहेत. मी मैदानावर लक्ष न देता फक्त चेंडूवर लक्ष केंद्रित करतो. यशस्वी जयस्वालसोबत फलंदाजी करताना मला आत्मविश्वास मिळतो. तो मैदानात खूपच सकारात्मक असतो', असे वक्तव्य वैभव सूर्यवंशीने केले.