चेन्नईतील एमए चिदंबरम स्टेडियमवर झालेल्या टी-२० विश्वचषकाच्या सुपर ८ फेरीतील सामन्यात भारताने दमदार विजय मिळवलाय. भारताने झिम्बाब्वेविरुद्ध ७२ धावांनी दणदणीत विजय मिळवला. यासह टीम इंडियाने उपांत्य फेरीच्या आशा जिवंत ठेवल्या आहेत. याचबरोबर दक्षिण आफ्रिकेला बाद फेरीत पोहोचवलंय. सुपर ८ चे दोन्ही सामने जिंकून दक्षिण आफ्रिका +२.८९० च्या नेट रन रेटसह ग्रुप १ मध्ये अव्वल स्थानावर आहे.

या सामन्यात भारतीय संघाने झिम्बाब्वेला विजयासाठी २५७ धावांचे लक्ष्य दिले होते, परंतु त्यांना ६ गडी बाद १८४ धावाच करता आल्या. भारतीय संघाला आता सेमीफायनलमध्ये पोहोचण्यासाठी वेस्ट इंडिजला हरवावे लागेल. भारत-वेस्ट इंडिज सामना १ मार्च रोजी कोलकाता येथील ईडन गार्डन्सवर खेळला जाणार आहे. दरम्यान झिम्बाब्वेने नाणेफेक जिंकून प्रथम गोलंदाजी करण्याचा निर्णय घेतला होता मात्र त्यांचा हा निर्णय पूर्णपणे चुकीचा ठरला.

इशान किशन, अभिषेक शर्मा, हार्दिक पांड्या आणि तिलक वर्माने झिम्बाब्वेच्या गोलंदाजांची जबर धुलाई केली. भारताने दिलेल्या आव्हानाचा पाठलाग करताना झिम्बाब्वेने चांगली सुरुवात केली पण खूपच संथ राहिली. ब्रायन बेनेट आणि तादिवानाशे मारुमानी यांनी ६.२ षटकांत ४४ धावा जोडल्या. अक्षर पटेलने मारुमानी (२० धावा) ला बाद करून ही भागीदारी मोडली. त्यानंतर वरुण चक्रवर्तीने डायन मायर्सला फक्त ६ धावांवर बाद केलं.