टी २० वर्ल्डकप २०२६ स्पर्धेला सुरुवात होणार असून, पहिला सामना ७ फेब्रुवारीला मुंबईच्या वानखेडे स्टेडियममध्ये होणार आहे. त्याआधीच भारतीय क्रिकेट संघाला मोठा झटका मिळाला आहे. वेगवान गोलंदाज आणि ऑलराउंडर म्हणून अल्पावधीतच प्रकाशझोतात आलेला हर्षित राणा दुखापतीमुळं बाहेर होण्याची शक्यता आहे. राणा हा मुख्य चमूमध्ये होता. सराव सामन्यात दक्षिण आफ्रिकेविरुद्ध खेळताना त्याला दुखापत झाली होती. एएनआयच्या रिपोर्टनुसार, हर्षित राणाच्या जागी मोहम्मद सिराज याला संघात संधी देण्याचा निर्णय घेण्यात आल्याचे कळते. त्याची अधिकृत घोषणा लवकरच होईल.

हर्षित राणाबाबत लवकरच निर्णय?

भारतीय संघाचा कर्णधार सूर्यकुमार यादव यानं यूएसए विरुद्ध होणाऱ्या सामन्याच्या आधी झालेल्या पत्रकार परिषदेत हर्षित राणाच्या फिटनेसबाबत विचारलेल्या प्रश्नावर उत्तर दिले. हर्षित अद्याप बाहेर झालेला नाही. पण त्याच्या खेळण्याबाबत शंका आहे. ६ फेब्रुवारी संध्याकाळपर्यंत याबाबत माहिती मिळेल, असे सूर्यकुमार म्हणाला.

हर्षित राणा जर बाहेर गेला तर, त्याच्या जागी कोणाला संघात घेणार याबाबतही प्रश्न उपस्थित करण्यात आला. त्यावर मागील एक-दोन वर्षात कोणत्या वेगवान गोलंदाजांनी चांगली कामगिरी केली आहे, जे फलंदाजीही करू शकतील याचा विचार केला जाईल. पण जर नवव्या क्रमांकावर येणाऱ्या खेळाडूकडून मोठ्या फटक्यांची अपेक्षा करत आहात, तर मग वरचे आठ खेळाडू काय करत आहेत, असा प्रश्न आहे. त्यामुळे आम्ही सर्वात चांगल्या खेळाडूच्या निवडीचा प्रयत्न करू, असं सूर्यकुमार यादवनं स्पष्ट केलं.

मोहम्मद सिराजला संधी मिळणार?

हर्षित राणा संघाबाहेर झाल्यास मोहम्मद सिराज याचा भारतीय संघाच्या चमूमध्ये समावेश करण्याची शक्यता आहे. त्याची निवड जवळपास निश्चित मानली जात आहे. सिराज हा कसोटी, वनडे संघातील महत्वाचा भाग आहे. मात्र, तो गेल्या दीड वर्षात एकही टी २० आंतरराष्ट्रीय सामना खेळलेला नाही. २०२४ मध्ये श्रीलंका दौऱ्यावर तो अखेरचा टी २० आंतरराष्ट्रीय सामना खेळला होता. आतापर्यंत सिराज १६ टी २० सामने खेळला असून, त्यात १४ विकेट्स घेतल्या आहेत. जमेची बाजू म्हणजे टी २० मध्ये त्याचा इकॉनॉमी रेट आठपेक्षा कमी आहे.