टी ट्वेंटी विश्वचषकामध्ये आज भारत आणि पाकिस्तान यांच्यामध्ये लढत होणार आहे. २०२१ चा एकमेव पराभव वगळता भारतीय संघाने नेहमीच पाकिस्तानला धुळ चारली आहे. जगभरातील क्रिडाप्रेमींचे या सामन्याकडे लक्ष लागले असून न्यूयॉर्कमधील नासाऊ काउंटी आंतरराष्ट्रीय क्रिकेट स्टेडियमवर हा सामना होईल. परंतु भारत पाकिस्तानच्या या सामन्यात पाऊस खेळ बिघडवण्याची शक्यता आहे. कसे असेल हवामान अन् खेळपट्टी? जाणून घ्या सविस्तर.

कशी असेल खेळपट्टी?

न्यूयॉर्कमधील नासाऊ काउंटी आंतरराष्ट्रीय क्रिकेट स्टेडियम चर्चेत असण्याचे मुख्य कारण म्हणजे येथील खेळपट्टी ज्याने फलंदाजांना चकित केले आहे आणि गोलंदाजांना दिलासा मिळाला आहे. टी-20 क्रिकेटमध्ये असे दृश्य सामान्यपणे पाहण्याची चाहत्यांना फारशी सवय नसते. आत्तापर्यंत या खेळपट्टीने गोलंदाजांना साथ दिली आहे.

न्यूयॉर्कच्या खेळपट्टीवर पहिला डाव असो वा दुसरा डाव, येथे आतापर्यंत वेगवान गोलंदाजांचे वर्चस्व राहिले आहे. त्यामुळे आजच्या सामन्यात जसप्रीत बुमराह, अर्शदीप सिंग, मोहम्मद सिराज यांचा भेदक मारा निर्णायक ठरु शकतो. तसेच मोहम्मद आमिर, शाहीन आफ्रिदी हे पाकिस्तानचे गोलंदाजही भेदक मारा करु शकतात.

कसे असेल हवामान?

भारत पाकिस्तानमध्ये होणाऱ्या लक्षवेधी लढतीत पाऊस खेळ बिघडवण्याची शक्यता आहे. 9 जून रोजी नासाऊ काउंटीमध्ये सकाळी हवामान चांगले राहणार नाही आणि पाऊस पडण्याची शक्यता आहे, असा अंदाज वर्तवण्यात आला आहे.

हवामान अंदाजानुसार, नासो काउंटीमध्ये सकाळच्या सुमारास पावसाची सुमारे 61 टक्के शक्यता आहे. आता भारतात हा सामना रात्री 8 वाजल्यापासून पाहायला मिळेल पण अमेरिकेत हा सामना स्थानिक वेळेनुसार सकाळी 10.30 पासून सुरू होईल. अशा स्थितीत सकाळी पाऊस झाल्यास सामन्यात व्यत्यय येण्याची शक्यता आहे.