Jasprit Bumrah,Asia Cup 2023:

श्रीलंकेत आशिया चषक २०२३ स्पर्धेचा थरार सुरू आहे. या स्पर्धेत शनिवारी भारत आणि पाकिस्तान हे दोन्ही संघ आमने सामने होते. हा सामना पावसामुळे पूर्ण होऊ शकला नव्हता. त्यामुळे दोन्ही संघांना प्रत्येकी १-१ गुण दिला गेला आहे. दरम्यान नेपाळ विरूद्धच्या सामन्यापूर्वी भारतीय संघाला मोठा धक्का बसला आहे. अनुभवी गोलंदाज जसप्रीत बुमराह मायदेशी परतला आहे.

दैनिक जागरणच्या वृत्तानुसार जसप्रीत बुमराह मुंबईत परतला आहे. मात्र याबाबत कुठलीही अधिकृत माहिती समोर आलेली नाही. आशिया चषक सुरू असताना त्याचं भारतात परतणं ही भारतीय संघासाठी आणि रोहित शर्मासाठी चिंतेची बाब आहे.

भारतीय संघाला मोठा धक्का..

आशिया चषकातील तिसरा सामना भारत आणि पाकिस्तान या दोन्ही संघांमध्ये रंगला. या सामन्यात जसप्रीत बुमराहला फलंदाजी करण्याची संधी मिळाली. मात्र पावसामुळे दुसरा डाव रद्द झाल्याने त्याला गोलंदाजी करण्याची संधी मिळाली नाही. आता भारतीय संघाचा पुढील सामना येत्या सोमवारी रंगणार आहे. या सामन्यात जसप्रीत बुमराह खेळताना दिसून येणार नाही. (Latest sports updates)

आयर्लंडविरुद्ध केलं कमबॅक..

गेले काही महिने दुखापतीमुळे संघाबाहेर असलेल्या जसप्रीत बुमराहने आयर्लंड विरूद्धच्या टी -२० मालिकेतून कमबॅक केले होते. या मालिकेतील पहिल्याच सामन्यात त्याने अप्रतिम गोलंदाजी केली होती. हा मालिकेत त्याची मालिकावीर म्हणून निवड देखील करण्यात आली होती. आता जसप्रीत बुमराह मायदेशी परतल्याने क्रिकेट चाहत्यांची चिंता वाढली आहे.