Kusal Mendis On Angelo Mathews Wicket:

वर्ल्डकप २०२३ स्पर्धेतील ३८ व्या सामन्यात श्रीलंका आणि बांगलादेश हे दोन्ही संघ आमने सामने आले होते. या सामन्यात बांगलादेशने ३ गडी राखून विजय मिळवला. या सामन्यातील विजयापेक्षा श्रींलकेचा फलंदाज अँजेलो मॅथ्यूज जास्त चर्चेत राहिला.

मैदानावर फलंदाजी करायला आल्यानंतर त्याने पहिला चेंडू खेळण्यासाठी निर्धारीत वेळेपेक्षा जास्त वेळ घेतला. त्यामुळे त्याला टाईम आऊट घोषित करण्यात आलं.

तो आंतरराष्ट्रीय क्रिकेटमध्ये टाईम आऊट होणारा जगातील पहिलाच फलंदाज ठरला आहे. दरम्यान या प्रकरणावर श्रीलंकेचा कर्णधार कुसल मेंडिसने मोठं वक्तव्य केलं आहे.

कुसल मेंडिसने सामन्यानंतर बोलताना म्हटले की,'हे खूप निराशाजनक आहे. कारण मॅथ्यूज जेव्हा क्रिझवर पोहोचला त्यावेळी ५ सेकंद शिल्लक होती. फलंदाजीला आल्यानंतर त्याला जाणवलं की त्याच्या हेल्मेटचा स्ट्रॅप तुटला आहे. के खूप निराशाजनक आहे की, अंपायरने योग्य निर्णय घ्यायला हवा होता. आम्हाला त्यावेळी मॅथ्यूजची गरज होती.'

अँजेलो मॅथ्यूज जेव्हा फलंदाजीला आला त्यावेळी २५ वे षटक सुरु होते. सदीरा समरविक्रमा नुकताच बाद होऊन माघारी परतला होता. संघाची धावसंख्या ४ गडी बाद १३५ धावा इतकी होती. अँजेलो मॅथ्यूजसारख्या अनुभवी फलंदाजाने येऊन धावा करणं संघासाठी अतिशय महत्वाचं होतं. मात्र मॅथ्यूजला एकही चेंडू न खेळता माघारी परतावं लागलं. (Latest sports updates)

हा श्रीलंकेला मोठा धक्का होता.मॅथ्यूज बाद होऊन माघारी परतल्यानंतर चरीथ असलंकाने शतकी खेळी केली आणि धनजंय डि सिल्वाने महत्वपूर्ण भागीदारी करत संघाची धावसंख्या २७९ धावांपर्यंत पोहचवली.

बांगलादेशला हा सामना जिंकण्यासाठी २८० धावांची गरज होती. या धावांचा पाठलाग करताना बांगलादेशकडून नजमूल हुसेन शांतोने सर्वाधिक ९० धावांची खेळी केली. तर कर्णधार शाकिब अल हसनने ८२ धावांची खेळी करत संघाला विजय मिळवून दिला. या सामन्यात बांगलादेशने श्रीलंकेवर ३ गडी राखून मात केली.