श्रीलंकेचे 3 निलंबित क्रिकेटपटू मंगळवारी संध्याकाळी इंग्लंडहून (SL vs ENG) मायदेशी परतले आहेत. इंग्लंडमधील कोरोना प्रोटोकॅालच्या (Coronavirus) नियमांचे उल्लंघन केल्याबद्दल कुसल मेंडिस, दनुष्का गुणतिलाका आणि निरोशन डिकवेला यांना श्रीलंका क्रिकेटने (SCL) निलंबित केले होते. एसएलसीनेही जाहीर केले आहे की, भारता विरुद्धच्या टी-20 आणि एकदिवसीय सामन्यांच्या मालिकेसाठी या तिघांना संघात स्थान देण्यात येणार नाही.

श्रीलंकेच्या वर्तमानपत्रांमध्ये प्रसिद्ध झाल्यानूसार, चौकशीच्या निकालावरुन त्यांना किमान एक वर्षासाठी बंदी आणि दंड ठोठावला जाऊ शकतो. आगमन झाल्यानंतर तिन्ही खेळाडूंना 14-दिवस विलगीकरणात ठेवण्यात आले आहे. विलगीकरणाचे दिवस पूर्ण झाल्यावर त्यांना रविवारी डरहॅममधील घटनेच्या तपासाला सामोरे जावे लागेल.

दरम्यान, श्रीलंका क्रिकेटने (एसएलसी) सध्याच्या इंग्लंड दौर्‍यादरम्यान बायो-बबलचे उल्लंघन केल्याबद्दल फलंदाज कुसल मेंडिस आणि यष्टीरक्षक निरोशन डिकवेला यांच्यासह तीन क्रिकेटपटूंना निलंबित केले होते आणि त्यांना त्वरित घरी परत जाण्याचे आदेश दिले होते. या दोघांव्यतिरिक्त तिसर्‍या टी -20 आंतरराष्ट्रीय सामन्यात श्रीलंकेचा पराभव झाल्यानंतर सलामीवीर धनुष्का गुणतीलाका रात्री डरहॅमच्या रस्त्यावर फिरताना दिसला. या सामन्यात श्रीलंकेला 89 धावांनी दणदणीत पराभव पत्करावा लागला. तिन्ही खेळाडू या सामन्यात खेळले होते.