श्रीलंकेत एक धक्कादायक घटना घडलीये. एका क्रिकेट कोचचा खेळाडूंसोबत झालेल्या वादानंतर मृत्यू झाल्याचं समोर आलं आहे. कोलंबोमधील क्रिकेट क्लबमध्ये प्रशिक्षण देणारे 62 वर्षीय सुमित फर्नांडो यांची 8 ऑगस्ट रोजी खेळाडूंसोबत पाण्यावरून वाद झाला होता. या वादानंतर त्यांना मारहाण झाल्याचा आरोप आहे. रुग्णालयात उपचार सुरू असताना त्यांचा मृत्यू झाला. गुरुवारी त्यांच्यावर अंत्यसंस्कार करण्यात आले.

खेळाडूंसोबत नेमका काय वाद झाला?

सुमित फर्नांडो हे मोरतुवामध्ये प्रिन्स ऑफ वेल्स कॉलेजचे माजी क्रिकेट कोच होते. त्यांनी श्रीलंकेचा वनडे कर्णधार कुसल मेंडिस याच्यासह अनेक क्रिकेटपटूंना प्रशिक्षण दिलं होतं. 8 ऑगस्ट रोजी ते ब्लूमफिल्ड क्रिकेट अँड अ‍ॅथलेटिक क्लबमध्ये होते. त्यावेळी प्रशिक्षण घेणाऱ्या काही खेळाडूंना पाणी प्यायचं होतं. मात्र क्लबमधील नळाला पाणी येत नव्हतं. यावरून खेळाडू आणि फर्नांडो यांच्यात वाद सुरू झाला.

पोलिसांच्या माहितीनुसार, वाद वाढल्यानंतर फर्नांडो यांनी कथितपणे एका खेळाडूवर हल्ला करण्याचा प्रयत्न केला. त्यानंतर 17 वर्षांच्या एका खेळाडूने त्यांना मारहाण केल्याचा आरोप आहे. या घटनेत फर्नांडो जखमी झाले आणि त्यांना रुग्णालयात दाखल करण्यात आलं. तर उपचारादरम्यान त्यांचा मृत्यू झाल्याचं समोर आलं.

17 वर्षांचा क्रिकेटपटू अटकेत

या प्रकरणात पोलिसांनी सोमवारी 17 वर्षांच्या एका क्रिकेटपटूला अटक केलीये. 11 ऑगस्ट रोजी त्याला कोलंबो मॅजिस्ट्रेट कोर्टात हजर करण्यात आलं. त्यानंतर 17 ऑगस्टपर्यंत त्याला बाल देखभाल सेवा विभागाच्या देखरेखीखाली ठेवण्याचे आदेश देण्यात आलेत.

मृत्यूचं नेमकं कारण अद्याप अस्पष्ट

या प्रकरणाचा तपास सध्या सुरू आहे. फर्नांडो यांना याआधीपासूनच हार्टचा आजार होता अशी माहिती त्यांच्या वैद्यकीय नोंदींमधून समोर आलीये. अधिकाऱ्यांनी त्यांच्या मृतदेहाची तपासणी केली असून त्याचा अहवाल अद्याप आलेला नाही. त्यामुळे त्यांच्या मृत्यूमागचं नेमकं कारण काय होतं हे तपास अहवाल आल्यानंतरच स्पष्ट होणार आहे.

उद्यापासून भारत विरूद्ध श्रीलंकेच्या सिरीजला सुरुवात

भारत आणि श्रीलंका यांच्यातील टेस्ट सिरीजला सुरुवात होण्याच्या काही दिवस आधी ही घटना समोर आल्याने एकच खळबळ उडालीये. भारत आणि श्रीलंका यांच्यातील पहिली टेस्ट 15 ऑगस्टपासून गॉल मध्ये खेळवली जाणार आहे.