मुंबई: भारताची स्टार बॅडमिंटनपटू पी. व्ही. सिंधू हिनं सिंगापूर ओपन २०२२ च्या फायनलमध्ये दिमाखदार प्रवेश केला. तिनं सेमिफायनलमध्ये जपानच्या कावाकामीला अवघ्या ३१ मिनिटांत पराभूत केलं. तिनं हा सामना २१-१५ आणि २१-७ अशा मोठ्या फरकानं जिंकला.

तत्पूर्वी, सिंधू आणि कावाकामी यांच्यात दोन लढती झाल्या होत्या. दोन्ही लढतींमध्ये सिंधू सरस ठरली होती. या लढतीत सिंधूनं सुरुवातीपासूनच जपानच्या कावाकामीवर वर्चस्व निर्माण केलं होतं. सुरुवातीपासूनच ती गुणांमध्ये आघाडीवर होती. ती शेवटपर्यंत कायम राहिली. (Singapore Open 2022 PV Sindhu defeats Japan Kawakami enters final)

पी. व्ही. सिंधूकडे (P V Sindhu) एक वेळ अशी होती की, ती या लढतीत ११-८ अशी आघाडीवर होती. जपानच्या कावाकामीने जबरदस्त सर्व्हिस आणि क्रॉस कोर्टच्या दमदार खेळानं तीन गुण मिळवले आणि ती बरोबरीत आली. त्यानंतर दोघींमध्ये काट्याची टक्कर बघायला मिळाली. एकेक गुणासाठी दोघी झटत होत्या. मात्र, सिंधूने आपल्या अनुभवाच्या जोरावर आघाडी घेतली आणि पहिला गेम २१-१५ अशा फरकाने जिंकला. (Singapore Open)

सिंधूने दुसऱ्या गेममध्ये आपला वरचष्मा कायम ठेवला. कावाकामीला या लढतीत पुनरागमनाची संधीच दिली नाही. हा दुसरा गेम सिंधूने २१ - ७ अशा मोठ्या फरकाने जिंकला आणि सिंगापूर ओपनच्या अंतिम फेरीत प्रवेश केला.

तत्पूर्वी सिंधूने उपांत्यपूर्व फेरीत जगात १९ व्या क्रमांकावर असलेल्या हैन यू हिला १७-२१, २१-११, २१-१९ अशा फरकाने नमवले होते. ही लढत तब्बल १ तास ०२ मिनिटे चालली.