रोहित शर्माच्या नेतृत्वाखाली खेळत असलेला भारतीय संघ टी-२० वर्ल्डकप २०२४ स्पर्धेतील तिसरा सामना खेळण्यासाठी मैदानावर उतरणार आहे. १२ जून रोजी भारतीय संघाचा तिसरा सामना अमेरिकेविरुद्ध होणार आहे. हा सामना न्यूयॉर्कच्या नासाऊ कांऊटी स्टेडियमवर रंगणार आहे. दोन्ही संघांनी प्रत्येकी २-२ सामने जिंकले आहेत. त्यामुळे आज होणाऱ्या सामन्यात विजय मिळवणारा संघ थेट सुपर ८ मध्ये प्रवेश करणार आहे. यापू्र्वी झालेल्या दोन्ही सामन्यांमध्ये शिवम दुबेला संधी दिली गेली होती. मात्र दोन्ही सामन्यांमध्ये तो सुपरफ्लॉप ठरला आहे.

शिवम दुबेने आयपीएल २०२४ स्पर्धेत चेन्नई सुपर किंग्जकडून खेळताना शानदार कामगिरी केली होती. याच कामगिरीची दखल घेत त्याला टी-२० वर्ल्डकपसाठी भारतीय संघात स्थान दिलं गेलं होतं. मात्र तो या संधीचा त्याला फायदा घेता आलेला नाही. त्याला फलंदाजी करण्याची संधी मिळाली. आयर्लंडविरुद्धच्या सामन्यात तो २ चेंडूंचा सामना करुन खातंही न ऊघडता माघारी परतला. त्यानंतर पाकिस्तानविरुद्धच्या सामन्यात तो ९ चेंडूंत ३ धावा करत माघारी परतला.

शिवम दुबेने आयपीएल २०२४ स्पर्धेत धावांचा पाऊस पाडला होता. तो चेन्नई सुपर किंग्ज संघाकडून खेळताना मध्यक्रमात फलंदाजीला यायचा. यादरम्यान त्याने १४ सामन्यांमध्ये ३९६ धावा केल्या होत्या. यादरम्यान त्याने १६० च्या स्ट्राईक रेटने धावा केल्या. शिवम दुबेचं फॉर्ममध्ये येणं हे भारतीय संघासाठी अतिशय महत्वाचं आहे.

कारण भारतीय संघाने त्याला फिनिशर म्हणून संघात स्थान दिलं आहे. मैदान कितीही मोठं असलं, तर तरीही त्याच्याकडे चेंडू मैदानाबाहेर पाठवण्याची क्षमता आहे. त्याने यापूर्वीही शेवटी येऊन संघाला विजय मिळवून दिला आहे. त्यामुळे शिवम दुबेचं फॉर्ममध्ये येणं अतिशय महत्वाचं आहे.