आयसीसी टी-२० वर्ल्डकप जिंकल्यानंतर भारतीय संघाच्या नव्या पर्वाला सुरुवात झाली आहे. ही स्पर्धा झाल्यानंतर कर्णधार रोहित शर्मा, विराट कोहली आणि रविंद्र जडेजाने टी-२० आंतरराष्ट्रीय क्रिकेटला रामराम ठोकला आहे. या स्पर्धेनंतर भारतीय संघ झिम्बाब्वे दौऱ्यावर गेला होता. या मालिकेसाठी युवा खेळाडूंचा संघ पाठविण्यात आला होता.

या संघाची जबाबदारी युवा फलंदाज शुभमन गिलच्या हाती सोपवण्याता आली होती. या मालिकेत भारतीय संघाने ४-१ ने विजय मिळवला आहे. दरम्यान मालिकेतील शेवटच्या सामन्यात संजू सॅमसनने गगनचुंबी षटकार खेचला आहे. ज्याचा व्हिडिओ सोशल मीडियावर व्हायरल होत आहे.

या सामन्यात शुभमन गिल स्वस्तात माघारी परतला. त्यानंतर संजू सॅमसनने रियान परागसोबत मिळून डाव सांभाळण्याचा प्रयत्न केला. दरम्यान त्याला सुरुवातीच्या १० चेंडूत अवघ्या १४ धावा करता आल्या होत्या. त्यानंतर त्याने झिम्बाब्वेचा कर्णधार सिकंदर रजाच्या गोलंदाजीवर खणखणीत षटकार मारला. त्यानंतर सामन्यातील १२ व्या षटकात ब्रेंडन मावुताच्या षटकात सॅमसनने २ गगनचुंबी षटकार खेचले. या २ पैकी १ षटकार तर थेट मैदानाबाहेरच गेला.

संजू सॅमसनचा ११० मीटर लांब षटकार

सॅमसनने ब्रेंडन मावुताच्या षटकात जागेवरुनच ११० मीटर लांब षटकार खेचला. या चेंडूला लांबी आणि उंचीही मिळाली. त्यामुळे चेंडू स्टेडियमच्या बाहेर जाऊन पडला. सॅमसनने या सामन्यात निर्णायक खेळी केली. त्याने ४५ चेंडूंचा सामना करत १२८.८९ च्या स्ट्राईक रेटने ५८ धावा चोपल्या. या खेळीदरम्यान त्याने ४ चौकार आणि ४ षटकार खेचले. या षटकाराचा व्हिडिओ सध्या सोशल मीडियावर व्हायरल होत आहे.

या सामन्याबद्दल बोलायचं झालं, तर झिम्बाब्वेने नाणेफेक जिंकून भारतीय संघाला प्रथम फलंदाजी करण्याचं आमंत्रण दिलं. भारतीय संघाकडून फलंदाजी करताना संजू सॅमसनने सर्वाधिक ५८ धावांची खेळी केली. तर शिवम दुबेने २६ धावांची खेळी केली. या खेळीच्या बळावर भारतीय संघाने २० षटकअखेर ६ गडी बाद १६७ धावा केल्या. दरम्यान या धावांचा पाठलाग करताना झिम्बाब्वेचा डाव अवघ्या १२५ धावांवर आटोपला.