नेपाळ संघाने पहिल्यांदाच टी -२० वर्ल्डकप स्पर्धेत प्रवेश केला आहे. मात्र माजी कर्णधार संदीप लामिछाने ही स्पर्धा खेळण्यासाठी अमेरिकेला जाऊ शकणार नाहीये. कारण अमेरिकेने त्याला दुसऱ्यांदा व्हिजा देण्यास नकार दिला आहे. ज्यावेळी टी -२० वर्ल्डकप स्पर्धेसाठी नेपाळ संघाची घोषणा करण्यात आली. त्यावेळी बलात्काराच्या आरोपात संदीप लामिछाने तुरुंगात होता. आता त्याला क्लीनचीट मिळाली आहे. मात्र तरीदेखील त्याला अमेरिकेने व्हिजा देण्यास नकार दिला आहे.

संदीप लामिछानेला क्लीन चीट मिळाल्यानंतर नेपाळचे क्रिकेट फॅन्स खुश झाले होते. कारण त्यांना वाटलं होतं की, तो आता टी -२० वर्ल्डकप खेळण्यासाठी अमेरिकेला जाऊ शकतो. मात्र नेपाळमध्ये असलेल्या अमेरिकेच्या दूतावासाने त्याचा व्हिजा अर्ज फेटाळून लावला आहे.

अमेरिकेच्या दूतावासांकडून संदीप लामिछानेचा व्हिजा अर्ज फेटाळून लावण्याची ही पहिलीच वेळ नाही. यापूर्वी देखील २०१९ मध्ये त्याचा व्हिजा अर्ज फेटाळण्यात आला होता. त्यावेळी त्याने सोशल मीडियाद्वारे आपलं दुःख व्यक्त केलं होतं. आता पुन्हा एकदा हा अर्ज फेटाळल्यानंतर त्याने सोशल मीडियावर आपलं दुःख व्यक्त केलं आहे. त्याने पोस्ट शेअर करत लिहिले की, ' अमेरिकन दूतावासांनी तेच केलं जे यापूर्वी २०१९ मध्येही केलं होतं. त्यांनी अमेरिका आणि वेस्टइंडिजमध्ये होणाऱ्या टी -२० वर्ल्डकप स्पर्धेसाठीचा व्हिजा अर्ज फेटाळून लावला आहे.'

तरुणीवर बलात्कार करण्या प्रकरणी संदीप लामिछानेला ८ वर्षांची शिक्षा सुनावण्यात आली होती. मात्र त्यानंतर पाटन उच्च न्यायालयाने काठमांडू जिल्हा न्यायालयाने निर्णय फेटाळून लावला आणि संदीप लामिछाला क्लीन चीट दिली.