IPL Auction 2023 : आयपीएल 2023 च्या लिलावाला सुरुवात झाली आहे. अपेक्षेप्रमाणे अनेक खेळांडूवर अक्षरश: पैशांचा पाऊस पडला आहे. तसेच या लिलावात आतापर्यंतची सर्वात मोठी बोली इंग्लंडचा स्टार अष्टपैलू खेळाडू सॅम करन याच्यावर लागली आहे. पंजाब किंग्जने तब्बल 18.50 कोटी रुपयांना त्याला आपल्या संघात सामील करून घेतले आहे.

सॅम करनला दुखापतीमुळे आयपीएलच्या मागीलच्या मोसमाला मुकावे लागले होते. यंदाच्या सीजनमध्ये तो नव्या जोमाने पंजाब किंग्सची जर्सी घालून उतरणार आहे. करनला विकत घेण्यासाठी पंजाब किंग्ज आणि चेन्नई सुपर किंग्जमध्ये दीर्घ लढाई झाली, ज्यामध्ये पंजाबने बाजी मारली. यासह करन आयपीएलमधील आजवरचा सर्वात महागडा खेळाडू ठरला आहे. (Sports News)

सॅम करन आयपीएल कारकीर्द

आयपीएलमध्ये 32 सामने खेळणाऱ्या सॅम करनने 23 डावांमध्ये 22.47 च्या सरासरीने 337 धावा केल्या आहेत. आयपीएलमध्ये करनच्या नावावर दोन अर्धशतके आहेत, तर गोलंदाजीत त्याने 31 डावात 31.09 च्या सरासरीने 32 विकेट्स घेतल्या आहेत.  (IPL 2023)

पंजाब किंग्जकडून खेळताना करनने हॅट्ट्रिक देखील घेतली घेतली. 20 वर्षे आणि 302 दिवसांच्या वयात हॅट्ट्रिक घेणारा तो सर्वात तरुण खेळाडू आहे.

इंग्लिश खेळाडूंवर पैशांचा पाऊस

आतापर्यंत झालेल्या लिलावात इंग्लिश खेळाडूंवर संघाची नजर असल्याचं दिसून आलं आहे. सॅम करनसह हॅरी ब्रुक याला देखील हैदराबादने 13.25 कोटींमध्ये करारबद्ध केले आहे.