नवी दिल्ली: भारतीय क्रिकेट संघाचा (BCCI) दिग्गज फलंदाज रॉबिन उथप्पाने केवळ आंतरराष्ट्रीय क्रिकेटलाच नाही तर क्लब क्रिकेटलाही अलविदा केले आहे. ICC T20 विश्वचषकाचे पहिले विजेतेपद पटकावणाऱ्या संघाचा तो सदस्य राहिला आहे. रॉबिन उथप्पाने सर्व फॉरमॅटमधून निवृत्ती जाहीर केली आहे. टी-20 विश्वचषकासाठी भारतीय क्रिकेट संघाची घोषणा झाल्यापासून रॉबिन उथप्पा नाराज असल्याची चर्चा सुरु आहे. त्यामुळे त्याने हा मोठा निर्णय घेतला असल्याचे सोशल मीडियावर बोलले जात आहे.

बुधवार, १४ सप्टेंबर २०२२ रोजी उथप्पाने त्याच्या चाहत्यांसाठी सोशल मीडियावरुन माहिती दिली आहे. यावेळी त्याने बीसीसीआय आणि कर्नाटक क्रिकेट बोर्डचे आभार मानले आहे. देशासाठी आणि कर्नाटक राज्यासाठी खेळण्याची संधी मिळणे हा माझ्यासाठी मोठा सन्मान होता. सर्व चांगल्या गोष्टींना एक ना एक दिवस थांबायचे असल्याने, मोठ्या मनाने मी सर्व क्रिकेट फॉरमॅटमधून माझी निवृत्ती जाहीर करतो, असं त्याने पोस्टमध्ये म्हटले आहे.

उथप्पाने भारतासाठी ४६ एकदिवसीय आणि १३ टी-20 आंतरराष्ट्रीय सामने खेळले आहेत. त्याने ६ अर्धशतकांच्या बळावर एकदिवसीय सामन्यात ९३४ धावा केल्या. तर T20 मध्ये त्याने १ अर्धशतकासह २४९ धावा केल्या होत्या.