RCB vs KKR, Venkatesh Iyer Longest Six:

बंगळुरुच्या मैदानावर झालेल्या सामन्यात रॉयल चॅलेंजर्स बंगळुरु संघाला कोलकाता नाईट रायडर्स संघाकडून पराभवाचा सामना करावा लागला आहे. या सामन्यात प्रथम फलंदाजी करताना रॉयल चॅलेंजर्स बंगळुरु संघाने २० षटकअखेर ६ गडी बाद १८२ धावा केल्या. या धावांचा पाठलाग करताना कोलकाता नाईट रायडर्स संघाने १६.५ षटकात ७ गडी शिल्लक ठेऊन हे आव्हान पूर्ण केलं.

कोलकाता नाईट रायडर्स संघाकडून फलंदाजी करताना वेंकटेश अय्यरने सर्वाधिक ५० धावांची खेळी केली. या खेळीदरम्यान त्याने एक गगनचुंबी षटकार मारला. ज्याचा व्हिडिओ सध्या सोशल मीडियावर तुफान व्हायरल होतोय.

वेंकटेश अय्यरचा गगनचुंबी षटकार...

रॉयल चॅलेंजर्स बंगळुरुने दिलेल्या धावांचा पाठलाग करताना वेंकटेश अय्यरने ३० चेंडूंचा सामना करत ३ चौकार आणि ४ षटकारांच्या मदतीने ५० धावा चोपल्या. या वादळी खेळीदरम्यान त्याने या हंगामातील सर्वात लांब षटकार मारला.

या डावात त्याने १०६ मीटर लांब षटकार मारला. हा या हंगामातील सर्वात लांब षटकार आहे. यापूर्वी हा रेकॉर्ड इशान किशनच्या नावे होता. इशान किशनने फलंदाजी करताना १०३ मीटर लांब षटकार मारला होता. आता वेंकटेश अय्यरने हा रेकॉर्ड मोडून काढला आहे. (Cricket news in marathi)

तर झाले असे की,रॉयल चॅलेंजर्स बंगळुरु संघाकडून ९ वे षटक टाकण्यासाठी मयंक डागर गोलंदाजीला आला. या षटकातील चौथ्या चेंडूवर वेंकटेश अय्यरने १०६ मीटर लांब षटकार मारुन सर्वांनाच आश्चर्याचा धक्का दिला.

कोलकाता नाईट रायडर्स संघाचा शानदार विजय...

या सामन्याबद्दल बोलायचं झालं, तर कोलकाता नाईट रायडर्स संघाला हा सामना जिंकण्यासाठी १८३ धावांचं आव्हान होतं. या आव्हानाचा पाठलाग करताना कर्णधार श्रेयस अय्यरने २४ चेंडूत ३९ धावांची नाबाद खेळी केली. आपल्या खेळीदरम्यान त्याने २ चौकार आणि २ षटकार मारले. त्यापूर्वी सलामीला आलेल्या फिल सॉल्ट आणि सुनील नरेनने संघाला आक्रमक सुरुवात करुन दिली. दोघांनी मिळून ६.३ षटकात ८६ धावा जोडल्या. फिल सॉल्टने २० चेंडूत ३० धावांची खेळी केली. तर सुनील नरेनने २२ चेंडूत ४७ धावांची खेळी करत १९ चेंडू शिल्लक ठेऊन संघाला विजय मिळवून दिला.