एम चिन्नास्वामी स्टेडियमवर आज रॉयल्स चॅलेंजर्सच्या बेंगळुरुच्या गोलंदाजांना गुजरात टायटन्सला १४७ धावांवर रोखण्यात यश आलं. बेंगळुरुच्या संघाची आज सांघिक कामगिरी पहायला मिळाली. IPL 2024 च्या आजच्या सामन्यात आज रॉयल चॅलेंजर्स बंगलोर आणि गुजरात टायटन्स आमनेसामने आहेत. बऱ्याच दिवसांनंतर बेंगळुरू आपल्या घरच्या मैदानावर एम चिन्नास्वामी स्टेडियमवर खेळत आहे. या मैदानावर बेंगळुरूला ४ पैकी ३ सामने गमवावे लागले आहेत.

आरसीबीच्या गोलंदाजीपुढे गुजरातच्या फलंदाजांनी तर पार गुडघे टेकले. गुजरातच्या एकाही फलंदाजाला ४० धावांचा आकडा गाठता आला नाही. साहा, गिल आणि साई अनुक्रमे १,२ आणि ६ धावा करून तंबूत परतले. त्यानंतर आलेल्या शाहरूख खान (३७) आणि डेव्हिड मिलरने (३०) संघाचा डाव सावरला, पण त्यांनाही मोठी धावसंख्या उभारता आली नाही.

त्यानंतर आलेल्या राहुल तेवतियाने २१ चेंडूत १ षटकार आणि ५ चौकारांसह ३५ धावा केल्या. तर राशीद खान १८ धावांवर तर विजय शंकर १० धावांवर बाद झाला. मानव सुतार, मोहित शर्मा आणि नूर अहमद हे शेवटच्या षटकातील पहिल्या तीन चेंडूवर बाद झाले. आरसीबीकडून सिराज, यश दयाल आणि विजयकुमार वैशाख यांनी प्रत्येकी २ विकेट मिळवल्या. तर कर्ण शर्माला एक विकेट मिळवण्यात यश आलं.