मुंबई : आयपीएलच्या १५ व्या हंगामात (IPL 2022) एकाहून एक रंगदार लढत पाहायला मिळत आहेत. फलंदाज षटकारांची आतषबाजी करतच आहेत, पण गोलंदाजही चमकदार कामगिरी करण्यासाठी कंबर कसत आहेत. तसंच मैदानात सामना अतीतटीचा झाल्यास फलंदाज आणि गोलंदाज आमने सामने येऊन एकमेकांना भिडल्याचंही प्रेक्षकांनी अनेकदा पाहिलं आहे. दरम्यान, मंगळवारी पुण्याच्या एमसीए मैदानात राजस्थान रॉयल्स (Rajasthan Royals) आणि रॉयल चॅलेंजर्स बॅंगलोरमध्ये (RCB) रंगतदार लढत झाली. त्यावेळी आरसीबीचा वेगवान गोलंदाज हर्षल पटेल (Harshal Patel) आणि राजस्थानचा फलंदाज रियान पराग (Riyan Parag) यांच्यात वादाची ठिणगी पेटली. राजस्थानने प्रथम फलंदाजी करत आरसीबीसमोर १४४ धावांचा आव्हान ठेवलं. रियान परागने मोक्याची वेळी अर्धशतकी खेळी केली. त्यानंतर शेवटच्या चेंडूवर षटकार मारल्यावर मैदानावर हर्षल पटेल आणि रियान परागमध्ये शाब्दिक चकमक झाली. त्यानंतर इतर खेळाडूंनी हर्षल आणि रियानला शांत करण्याचा प्रयत्न केला.

शेवटच्या षटकात रियान परागची फटकेबाजी

राजस्थानचे धावफलक रोखण्यासाठी आरसीबीकडून हर्षल पटेलने शेवटच्या षटकात गोलंदाजी केली. परंतु, वेगवान गोलंदाज हर्षल पटेलचा रियान परागने दोन षटकार ठोकत धुव्वा उडवला. त्यामुळे राजस्थानची धावसंख्या आणखी १८ धावांनी वाढली. रियानने हर्षलच्या गोलंदाजीत दोन षटकार, एक चौकार मारले तसंच दोन धावाही काढल्या. शेवटच्या चेंडूवर रियानने षटकार ठोकल्याने हर्षल चिडला आणि दोघांमध्ये वाद झाला. रियानने या सामन्यात ३१ चेंडूत ५६ धावा कुटल्या. यामध्ये तीन चौकार आणि चार षटकारांचा समावेश आहे.

मंगळवारी झालेल्या राजस्थना रॉयल्स आणि बंगळुरुच्या सामन्यातही १४५ धावांचा पाठलाग करताना चेज मास्टर विराटने अवघ्या ९ धावाच केल्या. तसंच बंगळुरु संघाच्या सर्वच फलंदाजांनी राजस्थान समोर नांगी टाकल्याने २९ धावांनी आरसीबीचा पराभव झाला. राजस्थान विरुद्धच्या सामन्यात बंगळुरुचा विराट कोहली सलामीवीर फलंदाज म्हणून मैदानाता उतरला होता. परंतु, विराटने १० चेंडूत ९ धावा केल्याने बंगळुरुचा हा प्रयोगही सपशेल अपयशी ठरला. कोहलीने आयपीएलच्या यंदाच्या हंगामात ९ सामने खेळले असून १२८ धावा केल्या आहेत.