R Ashwin Record In Test Cricket: भारतीय संघाने बांगलादेशविरुद्धच्या पहिल्या कसोटीत शानदार विजय मिळवला आहे. चेन्नईच्या मैदानावर पार पडलेल्या सामन्यात लोकल बॉय आर अश्विन चमकला. आधी मुख्य फलंदाज स्वस्तात माघारी परतल्यानंतर अश्विनने शानदार शतक झळकावलं.

त्यानंतर संघाला गरज असताना अश्विनने पंचक घेत भारतीय संघाच्या विजयात मोलाची भूमिका बजावली. दरम्यान ५ विकेट घेताच अश्विनच्या नावे एका मोठ्या विक्रमाची नोंद झाली आहे.

या सामन्यातील पहिल्या डावात गोलंदाजी करताना अश्विनला एकही गडी बाद करता आला नव्हता. मात्र दुसऱ्या डावात त्याने शानदार कमबॅक केलं आणि २१ षटकात ८८ धावा खर्च करत ६ गडी बाद केले. यासह तो कसोटीत भारतीय संघासाठी ५ गडी बाद करणारा सर्वात वयस्कर गोलंदाज ठरला आहे.

पहिल्या डावात शतक

या सामन्यातील पहिल्या डावात फलंदाजी करताना आर अश्विनने शानदार शतकी खेळी केली. त्यानंतर दुसऱ्या डावात गोलंदाजी करताना त्याने ६ गडी बाद केले. यासह त्याने चौथ्यांदा कसोटी क्रिकेटमध्ये शतक झळकावल्यानंतर गोलंदाजीत ५ गडी बाद करण्याचा कारनामा केला आहे. या रेकॉर्डमध्ये आर अश्विन दुसऱ्या स्थानी आहे. इंग्लंडचा माजी क्रिकेटपटू इयान बॉथम अव्वल स्थानी आहे.

आर अश्विनने हा कारनामा ४ वेळेस करुन दाखवला आहे. तर इयान बॉथम यांनी हा कारनामा ५ वेळेस केला होता. तर वेस्टइंडीजचे माजी खेळाडू गॅरी सोबर्स, मुश्ताक मोहम्मद, जॅक कॅलिस, शाकिब अल हसन आणि रविंद्र जडेजा यांनी हा कारनामा २-२ वेळेस करुन दाखवला आहे.

भारताचा शानदार विजय

या सामन्यात भारतीय संघाने बांगलादेशसमोर विजयासाठी ५१५ धावांचे आव्हान ठेवले होते. या धावांचा पाठलाग करताना बांगलादेशचा डाव २३४ धावांवर आटोपला. भारतीय संघाकडून गोलंदाजी करताना, आर अश्विनने सर्वाधिक ६ गडी बाद केले. रविंद्र जडेजाने ३ गडी बाद केले.