लॉकी फर्ग्युसननंतर आता ग्लेन मॅक्सवेलही दुखापतीमुळे आयपीएल २०२५ मधून बाहेर पडलाय. कोलकाता नाईट रायडर्स विरुद्धच्या सामन्यावेळी पंजाब किंग्सचा अष्टपैलू मॅक्सवेल दुखापतग्रस्त झाला होता. त्या सामन्यात तो सात धावा काढून बाद झाला होता. आता तो आयपीएलमधून बाहेर पडलाय. त्यात पंजाबच्या संघाला त्याची रिप्लेसमेंट मिळेना झालंय. त्याचं कारण ठरलं, पीसीएल. पीसीएलमुळे पंजाबला चांगला दर्जेदार खेळाडू मिळत नाहीये.

आयपीएल २०२५ ची स्पर्धा रोमांचक स्थितीत आलीय. ज्यामध्ये १० पैकी ९ संघ प्लेऑफमध्ये पोहोचण्याच्या शर्यतीत आहेत. यामध्ये एक नाव म्हणजे श्रेयस अय्यरच्या नेतृत्वाखाली खेळणारा पंजाब किंग्ज संघ. या संघाने आतापर्यंत १० पैकी ६ सामने जिंकलेत. तर पॉइंट्स टेबलवर हा संघ दुसऱ्या स्थानी आहे. त्याचदरम्यान पंजाबला मोठा धक्का बसलाय. याच कारण म्हणजे ऑलराउंडर खेळाडू ग्लेन मॅक्सवेल आयपीएलमधून बाहेर गेलाय.

हाताच्या बोटाला जखम झाली

पंजाब किंग्स संघाने आपल्या सोशल मीडिया प्लॅटफॉर्म एक्सवर पोस्ट करताना ग्लेन मॅक्सवेल आयपीएलमधून बाहेर पडत असल्याची माहिती दिली. पण मॅक्सवेलच्या जागी कोणता खेळाडू संघात येणार याची घोषणा अद्याप करण्यात आलीय. पण ग्लेन मॅक्सवेलचा पर्याय शोधण्यात येणाऱ्या अडचणींमागे पाकिस्तान सुपर लीग असल्याचं कारण मुख्य प्रशिक्षक रिकी पॉन्टिंग यांनी दिलंय.

दरम्यान पंजाब किंग्सने केलेल्या पोस्टमध्ये त्यांनी लिहिले की, बोटाच्या फ्रॅक्चरमुळे मॅक्सवेल या हंगामातील उर्वरित सामन्यांमधून बाहेर असणार आहे. तो लवकर चांगला व्हावा, अशा शुभेच्छा संघाने दिल्या आहेत. पंजाबच्या संघाने मॅक्सवेलला ४.२ कोटी रुपयात खरेदी केलं होतं.

आयपीएल २०२५ च्या हंगामात ग्लेन मॅक्सवेलची कामगिरी खूपच साधरण राहिलीय. यात त्याने ६ डावांमध्ये ८ च्या सरासरीने फक्त ४८ धावा केल्या आणि त्याचा स्ट्राईक रेट ९७.९५ होता. गोलंदाजीत मॅक्सवेलने सहा डावात २७.५ च्या सरासरीने चार विकेट्स घेतल्या. मॅक्सवेलला त्याच्या खराब कामगिरीमुळे अनेक माजी खेळाडूंकडून टीकेचा सामना करावा लागला. पंजाब किंग्जचा संघ सध्या आयपीएल २०२५ च्या पॉइंट्स टेबलमध्ये १० सामन्यांतून १३ गुणांसह दुसऱ्या स्थानावर आहे, ज्यामध्ये त्यांचा पुढील सामना ४ मे रोजी लखनौ सुपर जायंट्स संघाविरुद्ध खेळणार आहे.