पॅरिस पॅरालिंपिकमध्य भारतासाठी एक मोठी आनंदाची बातमी समोर आली आहे. पॅरिस पॅरालिम्पिक 2024 मध्ये भारताने तिसऱ्या पदकाची कमाई केली आहे. धावपटू प्रीती पालने 100 मीटर शर्यतीत कांस्यपदक पटकावलं आहे. प्रीतीने महिलांच्या 100 मीटर टी-35 अंतिम फेरीत तिसरे स्थान पटकावलं.

यासह पॅरालिम्पिक स्पर्धेत ट्रॅक इव्हेंटमध्ये पदक जिंकणारी ती पहिली भारतीय ठरली आहे. याआधी आज अवनी लेखरा हिने महिलांच्या 10 मीटर एअर रायफल एसएच1 फायनल स्पर्धेत सुवर्णपदक जिंकलं होतं. तर मोना अग्रवालने कांस्यपदक जिंकलं होतं.

प्रितीने महिलांच्या 100 मीटर (T35) स्पर्धेत पर्सनल बेस्ट टाईमिंग 14.21 सेकंदासह हे पदक जिंकलं. याच शर्यतीत चीनच्या झोऊ जियाने सुवर्णपदक जिंकले, तर गुओ कियानकियानने रौप्यपदक जिंकले. झोऊने 14.58 सेकंद वेळ नोंदवत सुवर्णपदक जिंकलं. तर गुओ हिने 13.74 सेकंदांचा वेळ घेतला.

प्रीतीचे कांस्यपदक पॅरिस पॅरालिम्पिकमधील पॅरा ॲथलेटिक्समधील भारताचे पहिले पदक आहे. पॅरालिंपिक खेळांमध्ये टी35 श्रेणी अशा पॅरा ॲथलीट्ससाठी आहे, ज्यांना हायपरटोनिया, ॲटॅक्सिया आणि एथेटोसिस आणि सेरेब्रल पाल्सी इत्यादी सारखे विकार आहेत.

दरम्यान, प्रीती पाल या वर्षाच्या सुरुवातीपासूनच जबरदस्त कामगिरी करत आहे. तिने मार्च 2024 मध्ये बेंगळुरू येथे झालेल्या 6व्या इंडियन ओपन पॅरा ॲथलेटिक्स चॅम्पियनशिपमध्ये 2 सुवर्ण पदके जिंकली होती. त्यानंतर तिने मे महिन्यात जपानमध्ये झालेल्या जागतिक पॅरा ॲथलेटिक्स स्पर्धेत तिसरा क्रमांक मिळवून कांस्यपदक जिंकलं होतं.