पॅरिस ऑलिम्पिक २०२४ (Paris Olympics 2024)स्पर्धेतील पहिल्या दिवशी भारतीय खेळाडूंनी चमकदार कामगिरी केली. हॉकीमध्ये भारतीय खेळाडूंनी विजयाने श्रीगणेशा केला आहे. पहिल्या सामन्यात भारत आणि न्यूझीलंड (India vs New Zealand )हे दोन्ही संघ आमनेसामने आले होते. या सामन्यात भारतीय खेळाडू न्यूझीलंडच्या खेळाडूंवर भारी पडले. शेवटी भारताने हा सामना ३-२ ने खिशात घातला. या शानदार विजयासह भारतीय खेळाडूंनी पदकाच्या दिशेने एक पाऊल टाकलं आहे. (Hockey News In Marathi)

भारतीय कर्णधाराचा निर्णायक गोल

शेवटच्या क्षणापर्यंत दोन्ही संघांमध्ये अटीतटीची लढत सुरू होती. शेवटी कर्णधार हरमनप्रीत सिंगने महत्वाच्या क्षणी गोल केला आणि विजय खेचून आणला. दोन्ही संघ बरोबरीत होते. मात्र हरमनप्रीत सिंगने केलेला गोल निर्णायक ठरला. भारताकडून हरमनप्रीत सिंगसह विवेक सागर प्रसाद आणि मनदीप सिंग यांनी गोल केले. तर न्यूझीलंडकडून सिमन चाईल्ड आणि सॅम लेनने गोल केले.

पराभवाची व्याजासह परतफेड

भारत आणि न्यूझीलंड या दोन्ही संघांमध्ये आतापर्यंत एकापेक्षा एक रोमांचक सामने पार पडले आहेत. यापूर्वी २०२३ मध्ये मायदेशात खेळताना भारतीय संघाला पराभवाचा सामना करावा लागला होता. आता भारतीय संघाने न्यूझीलंडला पराभूत करत वर्ल्डकप स्पर्धेतील उपांत्यपूर्व फेरीतील पराभवाचा बदला घेतला आहे. आता ऑलिम्पिक स्पर्धेत भारताने पराभवाचा बदला घेत विजयाने सुरुवात केली आहे.