ऑस्ट्रेलियातील ॲडलेड येथे क्लब क्रिकेट सामन्यादरम्यान पाकिस्तानी वंशाच्या एका क्रिकेटपटूला मैदानावरच जीव गमवावा लागला. यानंतर क्रिकेट विश्वात शोककळा पसरली आहे. ऑस्ट्रेलियातील कॉनकॉर्डिया कॉलेजमध्ये तीव्र उष्णतेमध्ये खेळल्या जाणाऱ्या क्लब सामन्यादरम्यान मैदानावर कोसळून क्लब स्तरावरील पाकिस्तानी वंशाचा क्रिकेटपटू जुनैद जफर खानचा मृत्यू झाला. ही घटना शनिवारी कॉनकॉर्डिया कॉलेजच्या मैदानावर घडली. जेथे तो ओल्ड कॉनकॉर्डियन्स क्रिकेट क्लबकडून खेळत होता. शनिवारी जेव्हा तो सामना खेळत होता तेव्हा तापमान ४१.७ अंश सेल्सिअस होते.

जुनैद अचानक जमिनिवर कोसळला

४० वर्षीय जुनैद गेल्या शनिवारी प्रिन्स अल्फ्रेड ओल्ड कॉलेजियन्स विरुद्धच्या सामन्यात ओल्ड कॉनकॉर्डियन्स क्रिकेट क्लबचे प्रतिनिधित्व करत होता. ४० ओव्हर क्षेत्ररक्षण केल्यानंतर आणि सात ओव्हर फलंदाजी केल्यानंतर तो अचानक जमिनिवर पडला. जुनैद खान रमजानमध्ये रोझा करत होता. पण आरोग्यासाठी तो दिवसभर पाणी पित राहिला.

दक्षिण ऑस्ट्रेलियामध्ये तापमान सर्वाधिक असते. हवामानशास्त्र विभागाच्या आकडेवारीनुसार, त्यावेळी तेथील तापमान ४० अंश सेल्सिअसपेक्षा जास्त होते. प्रचंड उष्णतेमुळे जुनैदचा क्रिकेट फिल्डवर मृत्यू झाला. वृत्तानुसार, जुनैद २०१३ मध्ये आयटी उद्योगात काम करण्यासाठी पाकिस्तानहून ऑस्ट्रेलियाला गेला होता.

वाचवण्याचा प्रयत्न अयशस्वी झाला

जुनैद खान कोसळल्यानंतर, घटनास्थळी उपस्थित असलेल्या पॅरामेडिक्सनी त्याला वाचवण्याचा प्रयत्न केला पण त्याला वाचवता आले नाही. जुनैद ओल्ड कॉनकॉर्डियन्स क्रिकेट क्लबकडून सामना खेळत होता. हा सामना ॲडलेडमधील कॉनकॉर्डिया कॉलेजमध्ये प्रिन्स अल्फ्रेड ओल्ड कॉलेजियन्स विरुद्ध झाला.

क्रिकेट क्लबने शोक व्यक्त केला

जुनैद खानच्या निधनानंतर, त्यांच्या क्रिकेट क्लबने शोक व्यक्त केला आणि म्हटले की, "आज कॉनकॉर्डिया कॉलेज ओव्हल येथे खेळताना झालेल्या दुर्घटनेला बळी पडलेल्या ओल्ड कॉनकॉर्डियन्स क्रिकेट क्लबच्या एका सर्वोत्तम सदस्याच्या निधनाने आम्हाला खूप दुःख झाले आहे. पॅरामेडिक्सच्या सर्वोत्तम प्रयत्नांनंतरही त्याला वाचवता आले नाही. या कठीण काळात आमच्या भावना आणि मनापासून संवेदना त्याच्या कुटुंबासोबत, मित्रांसोबत आणि सहकाऱ्यांसोबत आहेत.” जुनैदच्या मृत्युनंतर अति उष्णतेमध्ये क्रिकेट खेळण्याच्या धोक्यांबद्दल प्रश्न उपस्थित केले जात आहेत.