पाकिस्तान आणि इंग्लंडमध्ये तीन सामन्याची कसोटी मालिका सुरू आहे. यातील पहिल्या कसोटी सामन्यात पाकिस्तानच्या गोलंदाजाची जबर धुलाई होत आहे. मुलतान क्रिकेट स्टेडियमच्या सपाट खेळपट्टीवर पहिल्या दिवसापासून विक्रम होत आहेत. पाकिस्तानच्या तीन फलंदाजांनी शतके झळकावली आहेत, तर इंग्लंडच्या दोन फलंदाजांनी द्विशतके झळकावलीत. या सामन्यादरम्यान इंग्लंडने भारताचा २० वर्ष जुना विक्रम मोडीत काढलाय. पाकिस्तानमध्ये पाहुण्या संघाने सर्वाधिक धावा करण्याचा विक्रम भारतीय संघाच्या नावावर होता.

भारताने याच मैदानावर २००४ पाच विकेट गमावत ६७५ धावांवर आपला डाव घोषित केला होता. याच कसोटी सामन्यात विरेंद्र सहेवागने ट्रिपल सेंचुरी केली होती. तर सचिन तेंडुलकर १९४ धावा करत नाबाद राहिला होता. मुल्तान कसोटीमध्ये इंग्लंडने पहिल्या डावात ७ विकेट गमावत ८२३ धावांवर आपला डाव घोषित केला होता.

पाकिस्तानविरुद्ध इंग्लंडच्या मुल्तान कसोटी सामन्याच्या चौथा दिवस आहे. ही खेळपट्टी गोलंदाजांना मदत करत नसल्याचं दिसून येत आहे. हे पाहता कसोटी सामना अनिर्णीत राहिल असे वाटते. दरम्यान पाकिस्तानने नाणेफेक जिंकून प्रथम फलंदाजी करत ५५६ धावा केल्या. कर्णधार शान मसूदने सर्वाधिक १५१ धावा केल्या. तर आगा सलमानने १०४ धावा केल्या तर अब्दुल्ला शफीकने १०२ धावा केल्या. तर आगा नाबाद परतला.

त्यानंतर मैदानात उतरलेल्या इंग्लंडच्या संघाची सुरुवात चांगली झाली नाही. कर्णधार ऑली पोप खातेही न उघडता बाद झाला, पण यानंतर इंग्लिश फलंदाजांनी पाकिस्तानी गोलंदाजांचा जोरदार समाचार घेतला. त्यामुळे सुरुवातीला आनंदाने टाळ्या टिपणाऱ्या पाकिस्तानच्या खेळाडूंना इंग्लिश फलंदाजांचे फटके खावे लागले.

जो रूटने ३७५ चेंडूंमध्ये २६२ धावा केल्या. या खेळीदरम्यान त्याने इंग्लंडकडून अनेक विक्रम केले. यामध्ये इंग्लंडकडून सर्वाधिक कसोटी धावांचा विक्रमचा समावेश आहे. या खेळीत रूटने २० हजार आंतरराष्ट्रीय धावाही पूर्ण केल्या. इंग्लंडकडून जॅक क्रॉलीने ७८ तर बेन डकेटने ८४ धावा केल्या. हॅरी ब्रूकने त्रिशतक झळकावले तो ३१७ धावा करून बाद झाला.