पाकिस्तानला न्यूझीलंडविरुद्ध झालेल्या टी-२० मालिकेत लाजिरवाण्या पराभवाला सामोरं जावं लागलं आहे. ५ टी-२० सामन्यांची मालिका पाकिस्तानने ४-१ ने गमावली आहे. पाकिस्तानला या मालिकेतील शेवटच्या सामन्यात ८ गडी राखून पराभवाचा सामना करावा लागला आहे.

या सामन्यात पाकिस्तानचा पहिल्या डावात फलंदाजीला आला होता. प्रथम फलंदाजी करताना पाकिस्तानला १२९ धावा करता आल्या. या धावांचा पाठलाग करताना न्यूझीलंडने अवघ्या १० षटकात दिलेलं आव्हान पूर्ण केलं.

मालिकेतील पाचव्या सामन्यात न्यूझीलंडला सामना जिंकण्यासाठी १२९ धावांची गरज होती. या धावांचा पाठलाग करताना न्यूझीलंडच्या फलंदाजांनी तुफान सुरुवात केली. इतक्या कमी आव्हानाचा पाठलाग करताना, सिफर्टने २५५.२६ च्या स्ट्राईक रेटने अवघ्या ३८ चेंडूत ९७ धावांची खेळी केली.

या खेळीदरम्यान त्याने १० चौकार आणि ६ षटकार मारले. सलामीला फलंदाजीसाठी आलेल्या सिफर्ट आणि एलेनने मिळून पहिल्या विकेटसाठी ९३ धावांची भागीदारी केली. या दोघांच्या वादळी फटकेबाजीमुळे न्यूझीलंडने १० षटकं शिल्लक ठेवून हा सामना आपल्या नावावर केला.

पाकिस्तानी फलंदाजांचा फ्लॉप शो

पाकिस्तानने या सामन्यासाठी आपल्या संघात ५ मोठे बदल केले होते. पाकिस्तानचा संघ प्रथम फलंदाजीसाठी मैदानात आला होता. या डावात फलंदाजी करताना पाकिस्तानी फलंदाजांचा फ्लॉप शो पाहायला मिळाला.

पाकिस्तानकडून सलामीला फलंदाजीला आलेला हसन नवाज पुन्हा एकदा शून्यावर बाद होऊन माघारी परतला. त्यानंतर विकेट्सची रांगच लागली. या सामन्यातही कर्णधार सलमान आगाने संघाचा भार आपल्या खांद्यावर घेतला. त्याने या डावातील सर्वाधिक खेळी करताना ३९ चेंडूंचा सामना करत ५१ धावांची खेळी केली.