माजी भारतीय कर्णधार आणि महान फलंदाज रोहित शर्माला त्याची क्रिकेट कारकिर्द आणि उत्कृष्ट नेतृत्व कौशल्यासाठी एक मोठा सन्मान मिळणार आहे. पुण्यातील अजिंक्य डी.वाय. पाटील विद्यापीठ (एडीवायपीयू) त्यांच्या १० व्या दीक्षांत समारंभात रोहित शर्माला मानद डॉक्टरेट (डी.लिट.) प्रदान करणार आहेत.

अजिंक्य डी.वाय. पाटील विद्यापीठाने बुधवारी अधिकृतपणे याची घोषणा केली. हा दीक्षांत समारंभ शनिवारी पुण्यात होणार आहे. हा एक भव्य आणि स्टार-स्टडेड कार्यक्रम असून यामध्ये रोहित शर्माकडे सर्वांचं लक्ष असणार आहे.

अजिंक्य डीवाय पाटील विद्यापीठाने याबाबत निवेदन जारी केलंय. यामध्ये म्हटलंय की, "क्रिकेट चाहते त्याला 'हिटमॅन' म्हणून ओळखतात, परंतु हा दीक्षांत समारंभ रोहित शर्माच्या आयुष्यातील एक अनोखा आणि विशेष टप्पा असणार आहे."

या समारंभाचे अध्यक्षपद अजिंक्य डीवाय पाटील विद्यापीठाचे अध्यक्ष आणि कुलपती डॉ. अजिंक्य डीवाय पाटील यांच्याकडे असणार आहे. क्रिकेटमधील अतुलनीय योगदानासाठी आणि जागतिक स्तरावर प्रेरणादायी नेतृत्वासाठी रोहित शर्माला सन्मानित केलं जाणार आहे.

अजिंक्य डीवाय पाटील विद्यापीठाने म्हटलंय की, टीम इंडियाचा दिग्गज खेळाडू रोहित शर्मा संयम, रणनीती आणि मानसिक शक्ती यांसारख्या मूल्यांचं एक प्रतिक आहे. जे २०२६ च्या पदवीधर विद्यार्थ्यांसाठी प्रेरणास्त्रोत देखील आहेत. या गुणांची दखल घेत रोहितला ही मानद डॉक्टरेट प्रदान करण्यात येतेय. रोहित शर्मा व्यतिरिक्त या दीक्षांत समारंभात समाजाच्या विविध क्षेत्रांमध्ये महत्त्वपूर्ण योगदान देणाऱ्या इतर प्रतिष्ठित व्यक्तींचाही सन्मान केला जाणार आहे.

टेस्ट आणि 20I मधून रोहित निवृत्त

३८ वर्षीय रोहित शर्माने टेस्ट क्रिकेट आणि टी-२० आंतरराष्ट्रीय क्रिकेटमधून निवृत्ती घेतली आहे. त्यामुळे सध्या तो वनडे क्रिकेटमध्ये भारताचे प्रतिनिधित्व करतोय. त्याच्या नेतृत्वाखाली भारताने ऐतिहासिक कामगिरी केलीये.

रोहित शर्माने आतापर्यंत भारतासाठी ५०८ सामने खेळले आहेत. या काळात त्याने ४२.३३ च्या सरासरीने आणि ८७.३४ च्या स्ट्राईक रेटने २०१०९ रन्स केलेत. रोहितचा आंतरराष्ट्रीय क्रिकेटमधील सर्वोत्तम स्कोर २६४ आहे. त्याने ५० शतकं आणि १११ अर्धशतकं केली आहेत. रोहितने आंतरराष्ट्रीय क्रिकेटमध्ये ६५० सिक्स आणि १९४६ चौकार मारले आहेत.