पॅरिस ऑलिम्पिक २०२४ (Paris Olympics 2024) स्पर्धेतील ११ व्या दिवशी भारतीय फॅन्ससाठी गुड न्यूज समोर आली आहे. भारताचा गोल्डन बॉय नीरज चोप्राने पात्रता फेरीत ८९.३४ मीटर भाला फेकत फायनलमध्ये प्रवेश केला आहे. (Neeraj chopra)

पॅरिस ऑलिम्पिक २०२४ स्पर्धेतील दहाव्या दिवशी मराठमोळ्या अविनाश साबळेने गुड न्यूज दिली. त्याने ३००० मीटर स्टीपलचेस स्पर्धेतील फायनलमध्ये प्रवेश केला आहे. दहाव्या दिवसाचा शेवट गोड झाल्यानंतर ११ व्या दिवशीही भारतीय खेळाडूंनी शुभ सुरुवात केली आहे. कोट्यावधी भारतीय ज्या क्षणाची आतुरतेने वाट पाहत होते. तो क्षण आला. भारताचा गोल्डन बॉय नीरज अॅक्शनमध्ये दिसणार होता.(Neeraj Chopra Throw)

भालाफेक प्रकारातील पात्रता फेरीत जिथे इतर खेळाडू ७०- ७५ मीटरच्या पुढे जात नव्हते. तिथे नीरजने पहिल्याच प्रयत्नात ८९.३४ मीटर भाला फेकला आणि भारताचं एक पदक जवळजवळ निश्चित झालं आहे. मंगळवारी भालाफेक प्रकारातील पात्रता फेरीतील सामने खेळले गेले. नीरज चोप्राचा बी ग्रुपमध्ये समावेश करण्यात आला होता. ज्यात नीरजने पहिल्याच प्रयत्नात ८९.३४ मीटर भाला फेकत फायनलमध्ये प्रवेश केला. इतर कुठल्याच खेळाडूला ८९ मीटर इतका भाला फेकता आला नाही. जर्मनीच्या ज्युलियन वेबरने ८७.७६ मीटर इतका भाला फेकला.

भारताकडून नीरज चोप्रासह किशोर जेना देखील पात्रता फेरीसाठी मैदानात उतरला होता. त्याचा ए ग्रुपमध्ये समावेश करण्यात आला होता. त्याने ८०.७३ मीटर भाला फेकला. त्यामुळे तो पुढच्या फेरीत जाऊ शकलेला नाही. त्याचं स्पर्धेतील आव्हान संपुष्टात आलं आहे.