Mahendra Singh Dhoni : महेंद्रसिंह धोनीचे आई-वडील, त्याची पत्नी साक्षी आणि मुलगी झिवा कालचा चेन्नई विरुद्ध दिल्ली हा सामना पाहण्यासाठी आले होते. त्यामुळे काल धोनी निवृत्ती घेणार असल्याच्या सोशल मीडियावर चर्चा सुरु झाल्या होत्या. एमएस धोनीने काल निवृत्तीची घोषणा केली नाही. पण त्याने निवृत्ती कधी घेणार यावर भाष्य केले. एका पॉडकास्टमध्ये धोनीने रिटायरमेंटच्या चर्चांवर प्रतिक्रिया दिली.

चेन्नई सुपर किंग्स विरुद्ध दिल्ली कॅपिटल्स हा सामना काल चेपॉकच्या स्टेडियममध्ये खेळला गेला. या सामन्यात दिल्लीने २५ धावांनी चेन्नईचा पराभव केला. या सामन्यात आक्रमक पद्धतीने न खेळल्याने महेंद्रसिंह धोनीवर टीका करण्यात आली होती. कालच्या सामन्यामध्ये एमएस धोनीने २६ बॉल्सवर ३० धावा केल्या होत्या. आक्रमक खेळायची गरज असताना धोनी संथगतीने खेळला, त्यामुळे चेन्नईचा पराजय झाला असे लोक म्हणत होते.

राज शमानीच्या पॉडकास्ट चॅनलवर महेंद्रसिंह धोनीने भेट दिली. तेव्हा पॉडकास्टमध्ये एमएस धोनी म्हणाला, 'मी अजूनही आयपीएल खेळत आहे आणि मी एका वेळेस एका वर्षाचा विचार करतोय. मी आता ४३ वर्षांचा आहे, या जुलैमध्ये मी ४४ वर्षांचा होईन. त्यामुळे आणखी एक वर्ष खेळायचे की नाही हे ठरवण्यासाठी माझ्याकडे १० महिने आहेत. पण हा निर्णय मी घेणार नाही, मी खेळेन की नाही हे माझे शरीर ठरवेल.'

आयपीएल २०२५ मध्ये धोनीने ४ सामन्यांमध्ये मिळून ७६ धावा केल्या आहेत. चेन्नई विरुद्ध बंगळुरू या सामन्यांमध्ये वरच्या क्रमावर फलंदाजीसाठी न आल्याने काही दिवसापूर्वी धोनीवर टिका झाली होती. त्यावर सीएसकेचे प्रशिक्षक स्टीफन फ्लेमिंग यांनी प्रतिक्रिया दिली होती. गुडघ्यांच्या दुखण्यामुळे धोनीला १० ओव्हर्स फलंदाजी करणे शक्य नसल्याचे फ्लेमिंग यांनी स्पष्ट केले होते. तेव्हापासून धोनीच्या निवृत्तीच्या चर्चा सुरु झाल्या होत्या.