आयसीसी टी -२० वर्ल्डकप २०२४ स्पर्धेतील ३९ व्या सामन्यात न्यूझीलंड आणि पापुआ न्यू गिनी हे दोन्ही संघ आमनेसामने आले होते. एकीकडे बलाढ्य न्यूझीलंड संघ तर दुसरीकडे नवखा पापुआ न्यू गिनीचा संघ. त्यामुळे सामना एकतर्फी होण्याची दाट शक्यता होती, आणि झालंही तसंच. पापुआ न्यू गिनीचा डाव अवघ्या ७८ धावांवर आटोपला. या धावांचा पाठलाग करताना न्यूझीलंड संघाने ७ गडी राखून हे आव्हान पूर्ण केलं. दरम्यान या सामन्यात न्यूझीलंडचा वेगवान गोलंदाज लॉकी फर्ग्युसनने मोठा कारनामा केला आहे.

लॉकी फर्ग्युसन हा टी -२० आंतरराष्ट्रीय क्रिकेटच्या इतिहासात सलग ४ षटक निर्धाव टाकणारा जगातील दुसराच गोलंदाज ठरला आहे. तर टी -२० वर्ल्डकप स्पर्धेच्या इतिहासात सलग ४ षटक निर्धाव टाकणारा पहिलाच गोलंदाज ठरला आहे. यापूर्वी कॅनडा संघातील गोलंदाज साद बीन जाफरने एका टी -२० आंतरराष्ट्रीय सामन्यात सलग ४ निर्धाव षटकं टाकली होती. यादरम्यान त्याने एकही धाव खर्च न करता २ फलंदाजांना बाद केलं होतं. तर लॉकी फर्ग्युसनने ३ फलंदाजांना पॅव्हेलियनची वाट दाखवली.

न्यूझीलंडकडून गोलंदाजी करताना लॉकी फर्ग्युसनने पहिल्याच चेंडूवर पापुआ न्यू गिनीच्या कर्णधाराला माघारी धाडलं. त्यानंतर त्याने पावरप्लेमध्ये निर्धाव षटक टाकलं. पावरप्लेचं षटक टाकल्यानंतर त्याला पुन्हा एकदा गोलंदाजी करण्याची संधी मिळाली. यावेळी त्याने फलंदाजांना एकही धाव करू दिली नाही.

त्यानंतर १२ व्या षटकात त्याने १७ धावांवर फलंदाजी करत असलेल्या चार्ल्स अमिनीला बाद करत माघारी धाडलं. त्यानंतर १४ व्या षटकात त्याने चेड सोपरला बाद केलं. हे षटकही निर्धाव होतं. यासह त्याने ४ षटकात एकही धाव न खर्च करता ३ गडी बाद केले.