IPL 2024 Latest News:

आयपीएल २०२४ स्पर्धेला येत्या काही दिवसात प्रारंभ होणार आहे. एक ट्रॉफी जिंकण्यासाठी १० संघ एकमेकांना चुरशीची लढत देताना दिसून येणार आहेत. ही स्पर्धा सर्वच खेळाडूंसाठी अतिशय महत्वाची असणार आहे.

कारण ही स्पर्धा झाल्यानंतर टी-२० वर्ल्डकप २०२४ स्पर्धेला प्रारंभ होणार आहे. त्यामुळे सर्वच खेळाडूंना आयपीएल स्पर्धेत चांगली कामगिरी करुन फॉर्ममध्ये येण्याची संधी असणार आहे. दरम्यान काही खेळाडू असे देखील आहेत, जे या स्पर्धेत शानदार खेळ करुन भारतीय संघात स्थान मिळवण्यासाठी दावेदारी आणखी मजबूत करु शकतात.

रिषभ पंत:

भारताचा स्टार यष्टीरक्षक फलंदाज रिषभ पंतचा डिसेंबर २०२२ मध्ये कार अपघात झाला होता. तेव्हापासून तो मैदानापासून दूर आहे. येत्या आयपीएल २०२४ स्पर्धेतून तो कमबॅक करणार आहे. पंतच्या अनुपस्थितीत इशान किशन,संजू सॅमसन आणि जितेश शर्माला संधी दिली गेली आहे. मात्र तिघांनाही मिळालेल्या संधीचं सोनं करता आलेलं नाही. त्यामुळे आयपीएल २०२४ स्पर्धेत शानदार कामगिरी करुन त्याला भारतीय टी-२० संघात कमबॅक करण्याची संधी असणार आहे.

विराट कोहली:

माध्यमातील वृत्तांमध्ये असा दावा करण्यात आला आहे की, आगामी टी-२० वर्ल्डकपसाठी विराट कोहलीला भारतीय संघात स्थान दिलं जाणार नाही. कोहलीच्या कारकिर्दीबद्दल बोलायचं झालं तर त्याने ११७ टी-२० आंतरराष्ट्रीय सामन्यांमध्ये ५१.७६ च्या सरासरीने ४०३७ धावा केल्या आहेत. इतका दमदार रेकॉर्ड असून सुद्धा त्याला संघात स्थान मिळणार नाही अशा चर्चा सुरु आहेत. दरम्यान आगामी आयपीएल २०२४ स्पर्धेत चांगली कामगिरी करुन तो सर्व अफवांवर पडदा टाकण्याच्या प्रयत्नात असणार आहे. (Cricket news in marathi)

केएल राहुल:

भारताचा यष्टीरक्षक फलंदाज केएल राहुल भारत- इंग्लंड कसोटी मालिकेदरम्यान दुखापतग्रस्त झाला होता.त्यामुळे त्याला मालिकेतून बाहेर पडावं लागलं होतं. माध्यमातील वृत्तानुसार तो आयपीएलच्या सुरवातीच्या सामन्यांना मुकणार असण्याचा अंदाज वर्तवण्यात आला आहे. आयपीएलच्या गेल्या हंगामातूनही त्याला दुखापतीमुळे बाहेर राहावं लागलं होतं. दरम्यान त्याला जर भारतीय टी-२० संघात कमबॅक करायचं असेल तर आयपीएल स्पर्धेत चांगली कामगिरी करुन दाखवावी लागणार आहे.